O‘zbekistonda mehnat haqlari 2023-yil birinchi yarmida o‘tgan yilning mos davriga nisbatan 6,5 foizga o‘sdi. Bu haqda Markaziy bank raisi Mamarizo Nurmurodov ma’lum qildi, deya xabar bermoqda “Daryo” muxbiri.
Mamarizo Nurmurodovning aytishicha, ish haqining o‘sishi bir qator sohalarda talabni oshirmoqda.
“Iqtisodiyotda mehnat haqlarining real hisobda keng qamrovli o‘sishi kuzatildi. Ya’ni 2023-yil birinchi yarmida o‘tgan yilning mos davriga nisbatan 6,5 foiz o‘sish kuzatildi. Aholi daromadlarining ko‘payishi uy-joy, mebel, avtomobil, uzoq muddat foydalaniladigan tovarlar va xizmatlar sohasiga bo‘lgan talabni oshirmoqda. Aholining real daromadlarining o‘sishini barcha sohalarda kuzatilayotgani, bir tomondan, ish haqi xarajatlari orqali ishlab chiqarish hamda xizmat ko‘rsatish tannarx xarajatlarining oshishiga olib kelsa, ikkinchi tomondan, isteʼmol talabini rag‘batlantiruvchi asosiy drayverlardan bo‘lmoqda” , — dedi Mamarizo Nurmurodov.
 (2).png)
Markaziy bank raisining qo‘shimcha qilishicha, aholi va tadbirkorlarning inflyatsion kutilmalari hamon inflyatsiya darajasidan yuqori shakllanmoqda va iyun oyida 13—13,5 foizni tashkil qilgan.
“Aholining valyuta kursi o‘zgarishi, ish haqi va nafaqalar oshishining narxlarga taʼsiri ko‘chayishi borasidagi kutilmalari ortgan. Isteʼmol talabining oshishiga chakana kreditlarning sezilarli darajada o‘sish dinamikasi ham taʼsir ko‘rsatmoqda”, — dedi u.
Joriy yilning 6 oyida banklar tomonidan 116 trillion so‘mlik, o‘tgan yilning mos davriga nisbatan 1,3 barobarga ko‘p kreditlar ajratilgan. Ushbu o‘sishni asosan aholiga ajratilayotgan chakana kreditlar qo‘llab-quvvatlamoqda. Iyun oyi yakunlari bo‘yicha aholiga ajratilgan kreditlar (46 trillion so‘m) o‘tgan yilning mos davriga nisbatan 1,7 barobarga o‘sgan. Bunda, aholining avtokreditlar, mikroqarz, mikrokredit hamda ipoteka kreditlariga talabi yuqori bo‘ldi.
Izoh (0)