Наманган вилояти Учқўрғон туманида вояга етмаган қизнинг суратларини интернетда тарқатиб юбориш билан таҳдид қилган шахс қўлга олинди. Бу ҳақда вилоят ИИБ ахборот хизмати хабар берди.
Қайд этилишича, 13 июль куни Учқўрғон туманида яшовчи, тумандаги мактабнинг 15 ёшли 8-синф ўқувчиси (қиз) ариза билан мурожаат қилиб, шу туманда яшовчи 2004 йилда туғилган таниши аризачининг порнографик фотосуратларини Instagram ижтимоий тармоғи орқали тарқатиб юбориш билан қўрқитиб, 1 миллион сўм пул талаб қилаётганини билдириб, чора кўришни сўраган.
Шундан сўнг, 14 июль куни туман ИИБ ЖҚБ тезкор вакиллари ва ЭКГ эксперти томонидан ўтказилган тезкор тадбир давомида аризада номи келтирилган шахс аризачидан Учқўрғон тумани “Навбаҳор” маҳалласи ҳудудида 750 минг сўм пулларни олган вақтида ушланган.
Ушбу ҳолат бўйича туман ИИБ ҳузуридаги Тергов бўлими томонидан Жиноят кодексининг 165-моддаси (товламачилик) 1-қисми билан жиноят иши қўзғатилган.
Бир неча кун олдин Наманган вилоятида аёлдан шахсий маълумотларини тарқатиш билан қўрқитиб, пул талаб қилган эркакнинг товламачилигига чек қўйилганди. Март охирларида эса Андижонда талаба қизнинг шахсий суратларини ижтимоий тармоқларда тарқатмаслик учун пул талаб қилган шахс ушлангани, шунингдек, Самарқандда эркак “Одноклассники”да танишган аёлнинг суратларини монтаж қилиб, тарқатиш билан таҳдид қилгани тўғрисида хабар берилганди.
Изоҳ (0)