Бухоро ва Сурхондарё вилоятларида йўл қурилиш ишлари муносабати билан кўп сонли дарахт ва буталар кўчирилиши мумкинлиги ҳақида хабар берилган эди. Экология, атроф-муҳитни муҳофаза қилиш ва иқлим ўзгариши вазирлиги ҳолат юзасидан маълумот берди.
27 июль куни бўлиб ўтган матбуот анжуманида экология вазири биринчи ўринбосари Обиджон Қудратов ушбу масала юзасидан фикр билдириб, лойиҳа ҳужжатлари вазирлик билан келишилмагани, рад этилганини айтганди.
Вазирлик эълон қилган маълумотга кўра, 2023 йил 6 июль куни Бухоро вилояти ҳокимлиги А-380 автомобиль йўлининг 150-228 километр узунликдаги Ғузор—Бухоро—Нукус—Бейнов қисмини реконструкция қилиш лойиҳасини тасдиқлаш учун Экология вазирлигига юборган. Лойиҳада 31 371 та дарахт ва буталарни яқин атрофдаги бўш жойларга кўчириб ўтказиш кўзда тутилган.
Шу билан бирга, 7 июль куни Сурхондарё вилояти ҳокимлиги томонидан 4Р-100 Манғузор—Жарқўрғон—Бандихон—Олтинсой—Денов автомобиль йўлининг 128-174 километри ва 4Р-105 Дарбанд—Бойсун—Элбаён автомобиль йўлининг 5-70 километри қисмларини реконструкция қилиш лойиҳаси юзасидан 21 803 дона дарахтни белгиланган тартибда кўчириб ўтказишда амалий ёрдам сўраб мурожаат қилинган.
Бош вазир ўринбосари Жамшид Хўжаев томонидан имзоланган ҳукумат комиссиясининг 2023 йил 21 июлдаги баённомасига мувофиқ, Экология, атроф-муҳитни муҳофаза қилиш ва иқлим ўзгариши вазирлигига бир ҳафта муддатда дарахтларни атроф-муҳитга зарар етказмасдан кўчириш бўйича ҳукумат комиссиясига хулоса бериш ва тегишли таклифлар киритиш топширилган.
Таъкидланишича, ушбу ҳужжатда дарахтларни кесиш ҳақида бирорта ҳам сўз, шунингдек, бундай иссиқ мавсумда яшил майдонлар билан бирор-бир чора кўриш бўйича кўрсатмалар йўқ.
Экология, атроф-муҳитни муҳофаза қилиш ва иқлим ўзгариши вазирлиги ушбу мурожаатларга жавобан ўсимлик дунёси объектларини нобуд қилиш ёки уларга шикаст етказиш билан боғлиқ жиноятлар оғир жиноятлар тоифасига киритилиши, шунингдек, республика бўйлаб кузатилаётган чанг-тўзон ва қум бўронлари таъсирини камайтиришда ушбу дарахт ва буталарнинг ўрни муҳим эканлигини эслатган ҳолда рад жавобини берган.
Ҳокимликларга юборилган расмий жавоблардан сўнг Бухоро вилоятидан қурилиш компанияси вакиллари вазирликка ташриф буюриб, дарахт ва буталарга зарар етказмаган ҳолда лойиҳага ўзгартиришлар киритишлари ҳақида маълумот берган.
Изоҳ (0)