Namangan viloyatida ayoldan shaxsiy maʼlumotlarini tarqatish bilan qo‘rqitib, pul talab qilgan erkakning tovlamachiligiga chek qo‘yildi. Bu haqda IIV TQD Kiberxavfsizlik markazi xabar berdi.
Qayd etilishicha, To‘raqo‘rg‘on tumanida yashovchi O.G. ismli 23 yoshli ayol IIOga murojaat qilib, nomaʼlum shaxs sir saqlanishi lozim bo‘lgan maʼlumotlarini oshkor qilish bilan qo‘rqitib, undan pul talab qilayotganini maʼlum qilgan.
Tezkor-qidiruv tadbirlari natijasida, mazkur jinoyatni Namangan shahrida yashovchi 21 yoshli (erkak) M.A. sodir etgani aniqlangan.
Gumonlanuvchi M.A. Namangan tumani “Qo‘qonqishloq” MFY hududida O.G.ning uyali telefon qurilmasini ochiqdan ochiq tortib olib, agar 1 million so‘m pul bermasa, uning Telegram messenjeridagi shaxsiy yozishmalari va suratlarini internet tarmog‘i orqali barchaga tarqatishini aytib, po‘pisa qilgani maʼlum bo‘lgan.
Mazkur holat yuzasidan Jinoyat kodeksining 165-moddasi (tovlamachilik) 1-qismi bilan jinoyat ishi qo‘zg‘atilib, M.A.ning sodir etilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tezkor-surishtiruv ishlari olib borilmoqda.
Mart oxirlarida Andijonda talaba qizning shaxsiy suratlarini ijtimoiy tarmoqlarda tarqatmaslik uchun pul talab qilgan shaxs ushlangani, shuningdek, Samarqandda erkak “Odnoklassniki”da tanishgan ayolning suratlarini montaj qilib, tarqatish bilan tahdid qilgani to‘g‘risida xabar berilgandi.
Izoh (0)