Namangan viloyati Uchqo‘rg‘on tumanida voyaga yetmagan qizning suratlarini internetda tarqatib yuborish bilan tahdid qilgan shaxs qo‘lga olindi. Bu haqda viloyat IIB axborot xizmati xabar berdi.
Qayd etilishicha, 13-iyul kuni Uchqo‘rg‘on tumanida yashovchi, tumandagi maktabning 15 yoshli 8-sinf o‘quvchisi (qiz) ariza bilan murojaat qilib, shu tumanda yashovchi 2004-yilda tug‘ilgan tanishi arizachining pornografik fotosuratlarini Instagram ijtimoiy tarmog‘i orqali tarqatib yuborish bilan qo‘rqitib, 1 million so‘m pul talab qilayotganini bildirib, chora ko‘rishni so‘ragan.
Shundan so‘ng, 14-iyul kuni tuman IIB JQB tezkor vakillari va EKG eksperti tomonidan o‘tkazilgan tezkor tadbir davomida arizada nomi keltirilgan shaxs arizachidan Uchqo‘rg‘on tumani “Navbahor” mahallasi hududida 750 ming so‘m pullarni olgan vaqtida ushlangan.
Ushbu holat bo‘yicha tuman IIB huzuridagi Tergov bo‘limi tomonidan Jinoyat kodeksining 165-moddasi (tovlamachilik) 1-qismi bilan jinoyat ishi qo‘zg‘atilgan.
Bir necha kun oldin Namangan viloyatida ayoldan shaxsiy maʼlumotlarini tarqatish bilan qo‘rqitib, pul talab qilgan erkakning tovlamachiligiga chek qo‘yilgandi. Mart oxirlarida esa Andijonda talaba qizning shaxsiy suratlarini ijtimoiy tarmoqlarda tarqatmaslik uchun pul talab qilgan shaxs ushlangani, shuningdek, Samarqandda erkak “Odnoklassniki”da tanishgan ayolning suratlarini montaj qilib, tarqatish bilan tahdid qilgani to‘g‘risida xabar berilgandi.
Izoh (0)