Бирлашган Миллатлар Ташкилоти (БМТ) бош котиби Антониу Гутерриш глобал исиш ниҳоясига етгани, аммо унинг ўрнини “глобал қайнаш” эгаллаганини айтди. Бу ҳақда Тhe Guardian хабар берди.
Гутерришнинг қайд этишича, олимлар 2023 йил июлни рекорд даражадаги энг иссиқ ой деб атамоқда.
“Иқлим ўзгариши аллақачон мавжуд. Бу даҳшатли ва бу бошланиши. Ҳали ҳам глобал ҳароратнинг ошишини Цельсий бўйича 1,5 даражагача чеклаш ва энг ёмонидан қочиш мумкин”, — деди Гутерриш.
Аввалроқ у глобал исишга қарши кураш атрофидаги вазият назоратдан чиқиб кетаётгани ва жаҳон ҳамжамияти секин-аста фалокат томон кетаётганини айтганди.
Норасмий маълумотларга кўра, 29 июндан 6 июлгача дунёда ҳаво ҳарорати иссиқлик бўйича рекорд ўрнатган. Гутерриш жаҳон ҳамжамиятини иқлим инқирози оқибатларини юмшатиш учун чора кўришга чақирган.
Сентябрь ойида Нью-Йоркда БМТнинг иқлим амбициялари бўйича саммити бўлиб ўтади.
“Энг ёмон ҳолатга тушмаслик учун ривожланган давлатлар 2040 йилгача ёки ундан олдинроқ, ривожланаётган мамлакатлар эса 2050 йилгача углерод нейтраллигига эришиши керак”, — деди Гутерриш.
Изоҳ (0)