Бирлашган Араб Амирликлари (БАА) президенти Муҳаммад бин Зайд ал-Наҳаённинг укаси Саид бин Зайд ал-Наҳаён соғлиғидаги муаммолар туфайли вафот этди. Бу ҳақда WAM хабар берди.
Бир неча кун олдин БАА президенти укасининг соғлиғи билан боғлиқ муаммолар маълум бўлган. Қариндошлар уни нима безовта қилгани тафсилотларини очиқламаган. Марҳум Абу-Даби ҳукмдорининг вакили сифатида фаолият олиб борган.
Шу муносабат билан мамлакатда 29 июлгача уч кунлик мотам эълон қилинган.
Ал-Наҳаён сулоласи
Ал-Наҳаён — Абу-Дабидаги шайхлар (1761 йилдан) ва амирларнинг ҳукмрон сулоласи, шунингдек, БААнинг амалда меросхўр президентлари (1971 йилдан ҳозирги кунгача).
2022 йил 14 майдан бери шайх Муҳаммад бин Зайд ал-Наҳаён БАА президенти лавозимида фаолият юритмоқда. Шайх Саид бин Зайд ал-Наҳаён БААнинг амалдаги президентининг укаси.
Шайх Саид ҳаёти ва фаолияти
Шайх Саид 1965 йилда ал-Айн шаҳрида туғилган ва 1988 йилда БАА университетида сиёсий фанлар бўйича бакалавр даражасини олган. Ўқишни тамомлагач, Абу-Дабига режалаштириш вазирининг ўринбосари этиб тайинланди. 1991—1996 йилларда денгиз портлари департаменти раиси лавозимида ишлаган.
У БААнинг биринчи президенти ва асосчиси Шайх Зайд бин Султон ал-Наҳаённинг халқаро расмий ташрифлардаги вакили ҳам бўлган. 2002—2003 йилларда БАА футбол ассоциацияси президенти лавозимида ишлаган.
Шайх Саид бин Зайд ал-Наҳаён БААда йирик ривожланиш лойиҳаларини амалга оширишда муҳим рол ўйнаган, Абу-Даби Ижроия кенгаши, Абу-Даби Иқтисодий ривожланиш кенгаши аъзоси ва “Ал Ваҳда” спорт клуби раиси бўлган.
Изоҳ (0)