26 июль, чоршанба куни Москвада ёғган ёмғир сўнгги икки юз йил ичида худди шу куни кузатилган ёғингарчилик рекордини янгилади. Россия пойтахтининг кўчаларини сув босди.
Бир неча соат ичида Москвада 46 миллиметр ёмғир ёғди. Бу 1894 йил, 26 июлда қайд этилган энг юқори кўрсаткичдан баланд, деб хабар берди Москва шаҳар маъмурияти.
Таъкидланишича, ёғингарчиликнинг асосий қисми махсус қувурлар томонидан “ютилган”. Бироқ баъзи ҳудудларда кўчаларни сув босган, сув сатҳи йўл бўйлаб ҳаракатланаётган автомобиллар ойнасигача кўтарилган.
Шаҳар маъмуриятининг қўшимча қилишича, москваликлар учун яқин кунларда ёғингарчилик тугаши кутилмаяпти.
Аввалроқ Ҳиндистонда кучли ёмғирлар оқибатида келиб чиқаётган сув тошқинлари тарихий обидаларга зарар етказаётгани хабар қилинганди. Дунёга машҳур Тож Маҳал яқинида дарё қирғоғида жойлашган боғни сел ювиб кетган. Бундай ҳолат 45 йил ичида биринчи марта содир бўлди.
Афғонистонда эса Вардак вилоятида юз берган сув тошқинлари оқибатида 22 киши ҳалок бўлган, 40 киши бедарак йўқолган.
Изоҳ (0)