Тенгдошлари ҳақорат қилгани сабабли дўст орттириш умидида уйма-уй юрган 12 ёшли Шейден Уокер учун АҚШда 37 минг доллардан кўпроқ пул йиғилди.
Ўтган ҳафта техаслик Шейден қўшниси Бреннан ва Энжел Рейнинг 11 ёки 12 ёшли болалари бор-йўқлигини билиш мақсадида уйининг эшигини тақиллатган ва у билан мулоқот қилишни хоҳлашини айтган. Болакай унга дўстларсиз ҳаёт зерикарли бўлишини айтган.
Кўриш тешигидан олинган кадрларда Бреннан болага яқин атрофда яшовчи ўсмирлар ҳақида гапираётганини кўриш мумкин.
“Улар энди менинг дўстларим эмас, чунки мени ҳақорат қилишди”, — деб жавоб берган Шейден. Кейин Уокер Бреннандан фарзандлари бор-йўқлигини сўраган, у эса эндигина икки ёшга кирган қизи борлигини айтган.
“Бу ажойиб. Аслини олганда, икки ёшли болаларни яхши кўраман, улар жуда ёқимтой бўлишади. Менга синглим икки ёш бўлган пайтда у билан ўйнаш жуда ёқарди”, — деган Шейден.
Ушбу суҳбат Рейлар оиласига қаттиқ таъсир қилди ва улар TikTok’га камера билан олинган видеони жойлаштирди. Бир ҳафта ичида видео деярли 70 миллион марта кўрилди. Шунингдек, улар GoFundMe’да маблағ йиғишни бошлади. Бреннан ва Энжел бу пулга Шейден ўйинчоқлар, кўнгилочар боғга чипталар ёки унинг бахтли бўлишига ва дўст орттиришига ёрдам берадиган бошқа нарсаларни сотиб олишига умид қилган.
Шейден ҳақидаги видео ижтимоий тармоқларда ва оммавий ахборот воситаларида тарқалгач, унинг ота-онаси болакайнинг TikTok’даги саҳифасини ишга туширди. Улар TikTok’га ўғлини қўллаб-қувватлаган барчага миннатдорчилик билдиргани акс этган видеони жойлаштирган. Бироқ ўқувчининг онаси Рейлардан маблағ йиғишни тўхтатишни, чунки улар бунга муҳтож эмаслигини айтган. Рейлар маблағ йиғишни тўхтатди, бироқ улар Шейденнинг онаси фикрини ўзгартиргунига қадар ёки маблағни тақсимлашнинг яхши усулини топгунигача барча пулни GoFundMe’да қолдиришга қарор қилди.
Изоҳ (0)