Хонанда Сардор Мамадалиев “Ўзимизнинг гаплар” кўрсатувига берган интервьюсида нотўғри йўналишда қўшиқ куйлаши ва уни нега ҳамкасблари ёқтирмаслигига ойдинлик киритиб ўтди.
— Йўналишим профессионал хонандалар учун нотўғри ҳисобланади. Ҳамиша шу йўналишда қўшиқ куйланса овозга жиддий жароҳат етиши мумкин. Албатта, уларнинг танқидларини қабул қиламан, аммо менга шу йўналишда куйлаш ёқади. Аввалига ҳамкасбларнинг эътирози ёки қизиқчиларнинг ҳазил гап-сўзларини оғир қабул қилардим. Кейинчалик бунга эътибор бермай, мақсадим сари ҳаракатланишга қарор қилдим. “60 ёшга бориб овозингиздан айрилиб қолишингиз мумкин”, дейишади. У ҳақида ўйлашни хоҳламайман, муҳими ҳозир мароқ билан ижод қиляпман, — дейди хонанда Сардор Мамадалиев.
Хонанда ҳамкасблари уни ёқтирмаслиги ва нота билмайдиган ижодкорлар нега яхши натижага эришаётганини айтиб ўтди.
— Профессионал хонандаларнинг кўпчилиги мени ёқтирмайди. Бунга ҳам йўналишим сабаб бўлса керак. Мен ҳам ижодимни бошқаларга ўхшаш йўналишда бошлаганман. Ўша йиллари бастакор Мусахон Нурматов билан ҳамкорлик қилиб, бир йўналишда қўшиқ куйлаш урф бўлган пайтлар эди. Аммо қўшиқ яхши натижага эришмаган. Шундан кейин нега мен ҳаммага ўхшаб қўшиқ куйлашим керак, деб ўз-ўзимга савол берганман. Кейин ўзим ҳурмат қилиб қўшиқларини тинглайдиган хонандаларнинг йўналишидан бир чимдимдан олиб, мих йўналиш ҳосил қилганман. Мен Ботир Қодиров ёки Шоҳжаҳон Жўраевга тақлид қилмайман. Аммо Шерали Жўраевнинг ижодини кузатиб бораман, — дейди хонанда Сардор Мамадалиев.
Изоҳ (0)