Айни дамда оиласи билан АҚШда яшовчи Отабек Маҳкамов “Дарё”нинг YouTube’даги каналига берган интервьюсида машҳур санъаткор унга ижод билан шуғулланмасликни маслаҳат бергани ва кўчада қолган кунлари ҳақида гапириб берди.
— АҚШга энди борган пайтимда Чикаго штатига тўйга таклиф қилишди. У ерда Ўзбекистонда жуда машҳур бўлган хонандани учратиб қолдим. У гуруҳ бўлиб ижод қиларди ва уларнинг ижоди менга жуда ёқарди. Суҳбат давомида АҚШга ўқишга келганим ва бу ерда ҳам ижодимни давом эттириш ниятим борлигини айтдим. “Ижодингизни давом эттиролмайсиз, чунки сиздан зўр халқ артистлари ҳам келиб, АҚШда ижод қилолгани йўқ. Фалончи артист катта юк машинасини ҳайдаяпти, бошқаси эса кекса инсонларга қараб тирикчилик қиляпти”, деди. Суҳбат сўнгида эса ижодни йиғиштириб, фирмага ишга киришимни таклиф қилди. “Ижод билан шуғуллансангиз, даромадингиз уйнинг бир хонасини ижрага олишга етади, фирмага ишга кирсангиз эса, йилиги 500 минг АҚШ доллари топишингиз мумкин”, деган. Тўғри, у пайтда бу сумма мен учун жуда катта эди, аммо орзуларимдан воз кечишимга арзимади. Раҳмат айтдим, ўз билганимдан қолмаганман. Instagram’да блог яратиб, видеоларим машҳурликка эришганидан кейин ўша инсон мен билан алоқага чиқиб, “Табриклайман, мен ишонардим сенга”, деди. Суҳбат давомида эса фаолиятини реклама қилиб беришимни сўради. Пулини сўраганида унга текин эканлигини айтдим. Чунки унинг гаплари менга антимотивация бўлган, — дейди Отабек Маҳкамов.
Суҳбатдошимиз АҚШдаги ҳаёти давомида уйсизликдан қийналгани ҳақида ҳам сўзлаб берди.
— Калифорнияда қийналиб қолганимда Ўзбекистондан борган санъаткорлар “Нью-Йоркка келинг, ёрдам берамиз”, дейишган. Уй-жой масалалари қандай бўлади, у ерда ҳеч кимни танимайман, деганимда “Бизнинг уйимиз бор, ижара уйни уч кишига бўлиб тўлаймиз, муаммо эмас”, деган. Унинг гапига ишониб, 2016 йилнинг 9 сентябрь куни Нью-Йоркка келганман. “Фақат ижара пулини 1 сентябрдан ҳисоблаб тўлайсиз, чунки бу Америка”, дейишган. Барча шартларга рози бўлганман, аммо ўша куни ижара пулини берсам олишмаган. Эртаси куни ҳам бу ҳол такрорланган. Кейин билсам, уларнинг режалари ўзгариб, шерикчиликка мени эмас, Ўзбекистондан борган фолбин ўртоқларини қўймоқчи бўлишган экан. Ўша куни биз танишим билан кечки овқатни ресторанда қилишга келишгандик. Мен учрашувга кетсам “Узр, режалар ўзгарди, ўртоғим келиб жойлашди. Қаерда эканингизни айтсангиз, чамадонингизни юборамиз. Телефонимнинг қуввати тугаган”, деган хабар келди. Танишимга айтсам, у ҳам уйида жой йўқлигини айтиб, узр сўради. Қисқаси, ҳужжатларим ёнимда бўлмагани учун бирор меҳмонхонага ҳам жойлашолмадим ва кўчада қолиб кетдим. Бу мен учун катта сабоқ бўлди, — дейди Отабек Маҳкамов.
Отабек Маҳкамов АҚШда яшашнинг учта яхши ва ёмон жиҳатлари ҳақида ҳам гапириб ўтди.
— Яхши жиҳатлари: эркинлик бор, меҳнаткаш инсон орзуларига эришади ва 7 йил давомида бирорта коррупция билан боғлиқ ҳолатларга учраганим йўқ. Ҳатто мендан шу кунгача кимнинг фарзанди эканлигимга ҳам қизиқишмади. Ёмон жиҳатлари эса кўп штатларда гиёҳвандлик, хусусан, наша билан боғлиқ чекловлар йўқ. Қурол-яроғдан фойдаланишга ҳам оддий ҳолдек қарашади. Энг ёмон жиҳатларидан бири эса, болалар ҳам шунчалик эркинки, ҳатто ота-онасини жазолаш учун полицияга мурожаат қилишади, — дейди Отабек Маҳкамов.
Отабек Маҳкамовга китоб ёзиш нима учун керак эди ва уни чоп этиш учун қанча маблағ сарфлади?
— Китобим Туркиядаги “Фурқон” нашриётида 3 минг нусхада чоп этилди. Китоб тайёр ҳолга келгунига қадар 95 минг АҚШ доллари пул сарфланди. Тўғри, ҳамма харажатларни ўзим қоплаганим йўқ. Дўстларим бу борада қўллаб-қувватлашди. Аммо китоб сифатли бўлишини ва айнан учта тилда чоп этилишини истадим. Унда шу кунгача суҳбатда бўлган кўп инсонларим билан боғлиқ хотираларим ва улардан ўрганган жиҳатларим ҳақида ёздим. Бу китоб бестселлер бўлмаслиги мумкин, аммо шу ишни қилишим керак, деб ҳисобладим. Ҳеч бўлмаса, набираларим кун келиб уни ўқиб, менинг қандай инсон бўлганим ҳақида тасаввурга эга бўлишади, — дейди Отабек Маҳкамов.
Суҳбатни тўлиқ ҳолда қуйида томоша қилишингиз мумкин.
Изоҳ (0)