Грециянинг сайёҳлар орасида машҳур Родос ва Корфу оролларида йирик ўрмон ёнғинлари еттинчи кун давом этмоқда. Sky News хабарига кўра, Греция ҳукумати оммавий эвакуация эълон қилган. Ёнғин туфайли кўчирилганларнинг умумий сони 30 мингга етди.
“Бу Греция тарихидаги энг катта эвакуация бўлди”, — дейди ҳукумат вакили.
Эвакуация вақтида маҳаллий аҳоли ва сайёҳлар меҳмонхоналар, анжуманлар марказлари, мактаблар ва бошқа жамоат жойларига жойлаштирилиб, озиқ-овқат ва сув билан таъминланган.
“Ташқи ишлар вазирлиги билан келишилган ҳолда, бугун Родос аэропортида эвакуация вақтида саёҳат ҳужжатларини йўқотган меҳмонларнинг уйга қайтиши учун тезкор ёрдам пункти ташкил этилади”, — қўшимча қилди ҳукумат вакили.
Родос вице-мэри Константинос Тараслиас кучли шамол ўрмон ёнғинларига қарши курашда сезиларли қийинчиликлар туғдираётганини айтди.
“Сайёҳларимизни кўчириш учун катта ишлар қилинмоқда. Орол бугунги кунда жами 200 мингдан ортиқ сайёҳни қабул қилмоқда. Улардан 8 мингга яқини олов ичидаги ҳудудларда”, — деди Тараслиас.
Сайёҳлик компаниялари оролларга парвозларни бекор қилди. Хусусан, Jet2 Родосга режалаштирилган бешта йўловчи рейсларини бекор қилганини, аммо сайёҳларни эвакуация қилиш учун оролга бўш самолётлар жўнатишини билдирди.
Ҳафта бошида Родос оролида ўрмон ёнғинлари авж олди. Грецияда ўрмон ёнғинлари тез-тез учраб туради, бироқ сўнгги йилларда ёзнинг иссиқ, қуруқ ва шамолли келиши мамлакатни ўрмон ёнғинлари ўчоғига айлантирди. Бу йил эса Родосда иссиқлик 45 даражага етди. Метеорологлар иссиқ ҳаво ой охиригача давом этишидан огоҳлантирмоқда.
Изоҳ (0)