Ўзбекистоннинг бир нечта банки бирин-кетин Россиянинг “Юнистрим” пул ўтказмалари тизими билан ишлашни тўхтатгани ҳақида хабарлар тарқала бошлади. Мазкур хабарларга ойдинлик киритиш мақсадида “Дарё” Марказий банк билан боғланди.
Олинган маълумотга кўра, ҳақиқатан ҳам 14 та банк ушбу халқаро пул ўтказмалари тизими билан ишлашни тўхтатган. Дастлаб “Халқ банки”, “Ипотека банк”, “Турон банк” ва “Ориент Финанс банк” томонидан, кун якунига яқин Trastbank томонидан эълон қилинди. Ушбу банклар тизим билан ишлаш вақтинча тўхтатилганини маълум қилган ва ноқулайликлар учун узр сўраган.
Қайд этилишича, Ўзбекистон банкларидан Kapitalbank бир йил олдин, “Ипак Йўли” банки эса ўтган йил февраль ойида ушбу тизим билан ишлашини тўхатган эди. Ижтимоий тармоқларларда мазкур пул ўтказмалари тизимидан фойдаланиш яна бир нечта банкда, хусусан, “Асакабанк”, “Агробанк”, “Азия Альянс банк”, “Алоқабанк” ва Инфинбанкъда тўхтатилгани ҳақида хабарлар пайдо бўлди. “Агробанк”, “Асакабанк”, “Азия Альянс банк”ларнинг расмий веб-сайтларида пул ўтказмалари бўлимида келтирилган тизимлар рўйхатида “Юнистрим” олиб ташланган.
Бироқ “Алоқабанк” ва Инфинбанк расмий веб-сайтининг тегишли бўлимида юқоридаги тизим бўйича маълумотлар ва шартлар ҳозирча мавжуд. Бошқа тижорат банклари ҳозирча ушбу тизим билан ишлаш ёки ишламаслиги тўғрисида расман маълум қилмаган.
Мазкур тизим эгаси “Юнистрим” банки АҚШнинг блокловчи санкциясига тушган эди. Тизим Россиядан Ўзбекистонга пул ўтказмалари ўтказишда етакчилардан бири ҳисобланади.
Бундан ташқари, Қирғизистон банклари ҳам Россиянинг “Юнистрим” пул ўтказмалари тизими билан ишлашни тўхтатди. Республикадаги олтита банк тизим орқали транзакциялар амалга оширилмаслигини билдирди. Санкция чекловлари туфайли доллардаги кирувчи ва чиқувчи пул ўтказмалари мавжуд эмаслиги айтилмоқда.
Шунингдек, Тожикистон банклари ҳам Россиянинг ушбу тўлов тизими орқали пул ўтказмаларини тўхтатди.
Изоҳ (0)