Қашқадарё вилояти Деҳқонобод туманида тожик кавраги ўсимлигига яна шикаст етказилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар берди.
Деҳқонобод тумани Экология бошқармаси ишчи гуруҳи томонидан ўтказилган ўрганиш давомида “Деҳқонобод келажак томорқа хизмати” МЧЖ ҳудудида 815 туп каврак ўсимлигига зарар етказилгани аниқланган.
Шунингдек, ҳудуддан 0,50 грамм тожик кавраги смоласи, 4 дона махсус каврак ўсимлиги илдизини кесишга мўлжалланган пичоқ, 3 дона тош қайроқ, 5 дона махсус қўлда ясалган идиш ва кесиб, тахлаб қўйилган картон қоғозлар топилиб, далилий ашё сифатида вақтинчалик олиб қўйилган.
Ўрганиш натижасида ўсимлик дунёсига жами 403 миллион 425 минг сўм миқдорида зарар етказилган. Ҳолат юзасидан тўпланган ҳужжатлар прокуратурага юборилган.
Қашқадарёнинг Деҳқонобод туманида бундай ҳолат 16 июль ва 21 июль кунлари ҳам қайд этилганди. Биринчи ҳолатда 372 миллион 735 минг сўм, иккинчисида 1 миллиард 253 минг сўм зарар етказилганди.
Маълумот учун, Ўзбекистон Қизил китобига киритилган тожик кавраги ўсимлигига 2023 йилдан бошлаб 3 йилга мораторий жорий этилган.
Изоҳ (0)