Хитойдаги мактаблардан бирида спорт зали шифтининг қулаб тушиши оқибатида тўққиз киши ҳалок бўлди, яна икки киши вайроналар остида қолмоқда, деб хабар берди Sinxua.
Ҳодиса вақтида спорт залида 19 киши бўлган, улардан тўрт нафари ташқарига қочиб чиқа олган, 15 нафари вайроналар остида қолган.
24 июль эрталабки ҳолатга кўра вайроналар остидан 13 киши олиб чиқилди, улардан уч нафари ўлик эди, олти нафари тиббий ёрдамдан сўнг вафот этди.
Хитойнинг Хейлунцзян провинциясида жойлашган Цицикар шаҳридаги мактаб шифти 23 июль куни қулаб тушган. Ҳодиса сабаблари ҳозирча номаълум, бироқ дастлабки суриштирув ишлари натижасида қурувчилар қурилиш вақтида мактаб томига ноқонуний равишда перлит ётқизгани, у ёғингарчилик таъсирида сувни шимиб, шишиб кетгани, оқибатда том қулагани аниқланди. Қурилиш компанияси раҳбарлари полиция томонидан ҳибсга олинди.
Аввалроқ Хитойда эркак болалар боғчасига ҳужум қилиб, олти кишини ўлдиргани ҳақида хабар берилганди.
Эслатиб ўтамиз, 2021 йилда Хитой жанубидаги Гуанси-Чжуан автоном туманидаги болалар боғчасига бир эркак пичоқ билан ҳужум қилганди. Оқибатда 18 киши жароҳатланган — 16 бола ва икки ўқитувчи.
Изоҳ (0)