24 июль куни эрталаб Москвага дронлар ҳужум қилди. Бу ҳақда Москва мэри Сергей Собянин Telegram саҳифасида маълум қилди.
“Бугун, эрталаб соат тўртда иккита нотурар жой биносига дрон зарбалари қайд этилди. Жиддий вайронагарчилик ва қурбонлар йўқ. Барча тезкор хизматлар воқеа жойида ишламоқда”, — деди у.
Дронлардан бири Комсомолский проспектидаги бинога бориб урилган. 17-уйга зарар етди, деб хабар бермоқда “ТAСС” фавқулодда хизматлардаги манбага таяниб.
“Дастлабки маълумотларга кўра, қурбонлар йўқ”, — деди манба. Комсомолский проспекти бўйлаб йўналишлардан бирида транспорт ҳаракати тўсиб қўйилди, деб хабар қилди Москва транспорт департаменти.
“112” Telegram каналининг аниқлик киритишича, икки қаватли уйнинг томи вайрон бўлган, унинг қаршисидаги бошқа уйда биринчи қаватдаги дўкон ойналари ва тўртинчи қаватдаги квартира ойналари синган. Қўшни уйдаги ойналарга ҳам зарар етган.
Иккинчи дрон Лихачев проспектидаги бизнес маркази биносига келиб урилган.
“Портлаш юз берди. Ҳодиса оқибатида, дастлабки маълумотларга кўра, жабрланганлар йўқ”, — деб хабар берди “ТAСС” агентлигига фавқулодда вазиятлар хизмати.
Ўз навбатида Россия Мудофаа вазирлиги Украина томонидан “террорчилик ҳужуми” уюштирилгани ҳақида хабар берди. Вазирлик маълумотларига кўра, иккита дрон электрон кураш воситалари билан бостирилган, ҳеч ким жабрланмаган.
Эслатиб ўтамиз, 30 май куни ҳам Москвага дронлар ҳужуми уюштирилганди. Россия ҳужумда “Киев режими”ни айблаган. Украина президент офиси раҳбарининг маслаҳатчиси Михаил Подоляк “бунга бизнинг бевосита алоқамиз йўқ” деб таъкидлаган.
Изоҳ (0)