24 июль куни тонгда Москвага қилинган иккита дрон ҳужуми Украина Мудофаа вазирлиги Разведка Бош бошқармасининг (ГУР) махсус операцияси эди. Бу ҳақда “РБК-Украина” нашри Украина махсус хизматларидаги манбаларга таяниб, хабар берди.
Нашр суҳбатдошлари “қушчалар Москвагача учиб борди”, деб қўшимча қилди.
Ҳужумга ГУРнинг алоқадорлиги ҳақида “Украинская правда” нашрининг Украина хавфсизлик ва мудофаа секторидаги манбаси ҳам маълум қилди.
“Кўнгиллилар ва тузилмалар ўртасидаги ҳамкорлик яхши самара бермоқда, буни давом эттириш керак”, — деди у.
Дронларнинг Москвага ва аннексия қилинган Қримга тунги ҳужумини Украина рақамли трансформация вазири Михаил Федоров ҳам изоҳлади.
“Радиоэлектрон кураш мосламалари ва ҳаво мудофааси босқинчиларнинг осмонини кўп ҳимоя қилолмаяпти. У ерда нима бўлишидан қатъи назар, бундан кўпроғи кутилмоқда”, — деб ёзди у Telegram каналида.
Шу билан бирга, вазир ҳужумлар ортида расмий Киев турганини очиқ айтмаган.
Москва ва Қримга дронлар ҳужум қилди
24 июль куни эрталаб Москва мери Сергей Собянин иккита дрон шаҳардаги иккита нотурар жой биносига ҳужум қилгани ҳақида хабар берди. Битта учувчисиз учоқ бўлаклари Комсомолский проспектидаги 17-уй яқинига тушган, у ерга яқин жойда Россия Мудофаа вазирлиги биноси ҳам бор. Иккинчи дрон Лихачев проспектида қурилаётган бизнес марказга қулаган. Бинонинг юқори икки қаватидаги ойналар синган. Қурбонлар ҳақида маълумот берилмаган. Россия Мудофаа вазирлиги “Киев режими”ни терактга уринишда айблади. Расмий равишда Украина ҳукумати ҳужумга изоҳ бермади.
Шунингдек, 24 июль куни эрталаб аннексия қилинган яриморол раҳбари Сергей Аксенов Қримга учувчисиз учоқлар ҳужуми уюштирилганини маълум қилди. Унинг сўзларига кўра, ҳужум оқибатида Жанкой туманидаги ўқ-дорилар омборида портлашлар содир бўлган. Россия Мудофаа вазирлиги тунда Қрим осмонида 17 та дронни уриб туширганини маълум қилди.
Изоҳ (0)