Украина мудофаа вазири Алексий Резников CNN телеканалига берган интервьюсида НАТОнинг навбатдаги саммитига қадар Россия—Украина уруши Киевнинг ғалабаси билан якунланишини, шундан сўнг мамлакат альянсга таклиф қилинишини айтди.
Резников Шимолий Атлантика альянсининг 2024 йил июль ойида Вашингтонда бўлиб ўтадиган навбатдаги саммити юбилей бўлишини эслатиб ўтди: ўшанда НАТО ташкил топганига 75 йил тўлади.
“Ким билади, эҳтимол бу кун Украина учун жуда муҳим бўлиб қолар”, — деди вазир ва бу “фақат прогноз” эканини қўшимча қилди.
Резниковнинг тушунтиришича, Украина Қуролли кучлари альянс талабларига амал қилса ҳам, кенг кўламли уруш давом этаётган бир пайтда мамлакат НАТОга қабул қилинмайди. Вазир Украина НАТОга аъзо бўлиш учун зарур ислоҳотларни давом эттиришига ваъда берди.
У, шунингдек, украиналик учувчилар 2023 йил августида Американинг Ф-16 самолётларини бошқаришни ўргана бошлашини, 2024 йил баҳорига келиб эса бу самолётлар Украина осмонида пайдо бўлиши мумкинлигини айтди.
2023 йилнинг 11—12 июль кунлари Вильнюсда НАТОнинг навбатдаги саммити бўлиб ўтганди. Унинг асосий мавзуларидан бири — имкон қадар тезроқ НАТОга аъзо бўлишни талаб қилаётган Украинанинг альянсга кириши масаласи эди.
Саммит якунига кўра, НАТОга аъзо давлатлар Украинанинг альянсга кириш жараёнини соддалаштиришга келишиб олди. G7 давлатлари эса Украина учун хавфсизлик кафолатлари тўғрисидаги баёнотни қабул қилди, унга кўра, мазкур давлатлар Киевга ҳарбий ва молиявий ёрдам кўрсатишда давом этади, шунингдек, разведка маълумотлари алмашинуви жадал олиб борилади. Бундан ташқари, G7 давлатлари Россиянинг Украинага яна ҳужуми содир бўлса, зудлик билан чора кўришга ваъда берди.
Саммитдан сўнг Украина президенти Владимир Зеленский Киевнинг альянсга таклиф қилиниши умиди амалга ошмаган бўлса-да, мамлакат учрашувдан “катта ижобий натижа” олганини айтди.
Изоҳ (0)