Буюк Британияда 11 ёшли Адриан Ли ақлий қобилият даражаси (IQ)ни белгилаб берувчи тестда Ҳокинг ва Эйнштейнни ортда қолдириб, энг юқори натижани қайд этди. Бу ҳақда Mirror хабар берди.
Машҳур даҳолар 160 балл олган, Адриан Ли эса Менса IQ тестида 162 баллни қўлга киритган. Натижада Адрианга Менса жамиятига (юқори IQ’га эга одамлар жамияти) аъзо бўлиш таклиф қилинган.
Лондоннинг Барнет шаҳрида яшовчи Адриан Гонконгдан кўчиб келган. Онаси Рейчел ўғли “болалигиданоқ унда фарқли белгиларни” кузатган. Адриан “университет” сўзини атиги икки ёшида мукаммал талаффуз билан ўқий олган, гарчи у бу сўз нимани англатишини билмаган.
Рейчел икки ёшидан китобга иштиёқи ошган ўғли ҳар куни бир нечта китоб ўқишини айтди.
Болалар боғчасида у “Юлдузлар уруши” китобининг тўлиқ матнли версиясини ўқий бошлади. Адриан ҳатто саккиз ёшида романлар ёзишни бошлаган, у ҳаяжонли саргузашт ҳикояларини “Monster Quest” туркуми деб атаган. Ҳозирда у ўсмирлар учун Қадимги Рим ҳақида роман ёзмоқда, умид қиламанки, у кузгача нашр этилади, — дейди боланинг онаси.
Унинг қўшимча қилишича, Адриан бошланғич мактабда бир нечта академик мукофотларга сазовор бўлган ва тест, имтиҳонларни яхши кўради.
Сентябрь ойида бола Барнетдаги Қиролича Елизавета мактабига ўқишга кирмоқчи ва у ерда худди шундай истеъдодли болалар билан танишишга умид қилмоқда. Академик муваффақиятдан ташқари, Адриан шахмат, қиличбозлик, чанғи, стол тенниси, таэквондо, эшкак эшиш ва бошқаларни яхши кўради.
Аввалига Менса IQ жамиятига қўшилиш учун 148 балл олиш ҳақида ўйладим. Эйнштейн эга бўлган 160 баллга яқинлаша оламан деб ҳеч қачон ўйламагандим. Бу мен учун жуда ҳайратланарли ва таъсирли эди. Балки бир кун келиб кардиолог бўлиш, Кембриж дипломини олиш ва дунёдаги энг яхши шифокор бўлиш орзумни амалга ошираман! — деди боланинг ўзи.
Изоҳ (0)