Россияда давлат прокурори мухолифатчи сиёсатчи Алексей Навалнийни “экстремизм” иши бўйича 20 йилга озодликдан маҳрум этишни талаб қилди. Бу ҳақда Навалнийнинг маслакдоши Иван Жданов хабар берди. Унинг сўзларига кўра, прокурор Навалнийнинг махсус режимли колонияда жазо ўташини сўрамоқда.
Сиёсатчининг Twitter саҳифасида хабар берилишича, прокурор ушбу “экстремизм” ишида айбланаётган иккинчи шахс Даниел Холоднийни 10 йилга озодликдан маҳрум этишни талаб қилмоқда.
Суд ҳукми 4 август куни эълон қилиниши режалаштирилган.
Навалнийнинг янги иши бўйича суд мажлислари ёпиқ эшиклар ортида ўтмоқда.
20 июль куни Европа Иттифоқи Навалний жазо ўтаётган Владимир вилоятидаги 6-сонли колония бошлиғи, шунингдек, яна бир қанча амалдорларга нисбатан санкциялар киритди. ЕИ изоҳлашича, Владимир колонияси раҳбарияти инсон ҳуқуқларининг бузилишига, жумладан, қамоқхонадаги ғайриинсоний шароитлар ва Навалнийнинг жазо камерасига жўнатилиши учун жавобгар, деб топилган.
Алексей Навалний 2021 йил бошидан бери қамоқда, у “Ив Роше” иши бўйича синов муддатини бузганликда айбланиб, ҳибсга олинган. Кейин унга қарши яна бир қанча ишлар, жумладан, “фахрийга туҳмат қилиш” бўйича ҳукм чиқарилди. 2022 йил март ойида суд уни жами 9 йилга озодликдан маҳрум қилди.
Навалний ўтган йилни Владимир вилоятидаги 6-колонияда ўтказди, у ерда сиёсатчи турли баҳоналар билан доимий равишда жазо камерасига жўнатилмоқда.
2023 йил июнь ойи бошида суд Навалнийнинг янги ишини кўриб чиқишни бошлади, унда сиёсатчи бошқа нарсалар қатори “экстремистик ҳамжамият” яратишда айбланмоқда.
Изоҳ (0)