Британия Украинага бир йил аввал режалаштирилганидан 15 баробар кўпроқ артиллерия ўқ-дориларини юборди. Украина 16 минг снаряд ўрнига 200 мингдан ортиқ шаряд олди. Бу ҳақда Буюк Британия Мудофаа вазири Бен Уоллес маълум қилди.
“Оз сонли соҳаларда (хусусан, танкга қарши ўқ-дорилар) кутилганидан камроқ етказиб берганимизга қарамай, Украинанинг устувор йўналишларидан келиб чиқиб, артиллерия каби муҳим соҳаларда режаларимизни ортиғи билан бажардик”, — деди Бен Уоллес.
Мудофаа вазирининг сўзларига кўра, 2022 йилнинг апрелидан 2023 йилнинг мартигача Буюк Британия Украинани ҳарбий қўллаб-қувватлаш учун 2,3 миллиард фунт стерлинг (тахминан 2,9 миллиард доллар) сарфлаган. У, шунингдек, Буюк Британия Украинага ҳарбий ёрдам кўрсатиш бўйича АҚШдан кейин иккинчи ўринда эканлигини таъкидлади.
Бен Уоллеснинг сўзларига кўра, Украинага артиллерия снарядларидан ташқари 14 та Challenger 2 танки, шунингдек, улар учун 4 минг ўқ-дори ва камида 5 миллион пиёдаларга қарши қуроллар (миномёт ва гранаталар), 1,5 минг дона зенит қуроллари етказиб берилган. Украинага берилаётган ҳарбий ёрдамни британияликларнинг қарийб 70 фоизи қўллаб-қувватламоқда.
Изоҳ (0)