Britaniya Ukrainaga bir yil avval rejalashtirilganidan 15 barobar ko‘proq artilleriya o‘q-dorilarini yubordi. Ukraina 16 ming snaryad o‘rniga 200 mingdan ortiq sharyad oldi. Bu haqda Buyuk Britaniya Mudofaa vaziri Ben Uolles ma’lum qildi.
“Oz sonli sohalarda (xususan, tankga qarshi o‘q-dorilar) kutilganidan kamroq yetkazib berganimizga qaramay, Ukrainaning ustuvor yo‘nalishlaridan kelib chiqib, artilleriya kabi muhim sohalarda rejalarimizni ortig‘i bilan bajardik”, — dedi Ben Uolles.
Mudofaa vazirining so‘zlariga ko‘ra, 2022-yilning aprelidan 2023-yilning martigacha Buyuk Britaniya Ukrainani harbiy qo‘llab-quvvatlash uchun 2,3 milliard funt sterling (taxminan 2,9 milliard dollar) sarflagan. U, shuningdek, Buyuk Britaniya Ukrainaga harbiy yordam ko‘rsatish bo‘yicha AQSHdan keyin ikkinchi o‘rinda ekanligini ta’kidladi.
Ben Uollesning so‘zlariga ko‘ra, Ukrainaga artilleriya snaryadlaridan tashqari 14 ta Challenger 2 tanki, shuningdek, ular uchun 4 ming o‘q-dori va kamida 5 million piyodalarga qarshi qurollar (minomyot va granatalar), 1,5 ming dona zenit qurollari yetkazib berilgan. Ukrainaga berilayotgan harbiy yordamni britaniyaliklarning qariyb 70 foizi qo‘llab-quvvatlamoqda.
Izoh (0)