Ҳиндистонда рўй бераётган сув тошқинлари Тож Маҳалга ҳам зарар етказиши мумкин

Ҳиндистонда кучли ёмғирлар оқибатида келиб чиқаётган сув тошқинлари тарихий обидаларга ҳам зарар етказмоқда.

Дунёга машҳур Тож Маҳал яқинида дарё қирғоғида жойлашган боғни сел ювиб кетган. Бундай ҳолат 45 йил ичида биринчи марта содир бўлди.

XVII аср ўрталарида қурилган тарихий ёдгорликнинг подвалига сув кириши мумкин, бу эса иншоот пойдевори учун жуда хавфли.

Сув тошқинлари ҳозирда Аградаги бошқа тарихий обидаларга ҳам таҳдид солмоқда.

“Сув жуда кўп. Ҳамма нарса сув остида қолмоқда: ибодатхоналар, уйлар, ҳовлиларни сув босди. Бу одамлар ва бинолар учун катта муаммо. Сув биноларнинг пойдеворини ювиб кетиши, оқибатда улар қулаб тушиши мумкин”, — дейди ибодатхона руҳонийси Талман Сундер Дубей.

Охирги марта Тож Маҳални 1978 йилда рўй берган сув тошқини пайтида сув босган. Ўшанда мақбаранинг 22та ертўласи сув остида қолганди. Шундан сўнг Тож Маҳал яқинидаги Ямуна дарёси бўйида тўғон қурилганди. Аммо ҳозирда сувнинг кўтарилиши хавфсиз даражадан бир ярим метрга ошиб кетди.