“Путин қасос олиши мумкин”: АҚШ марказий разведка бошқармаси директори Пригожинга маслаҳат берди

АҚШ марказий разведка бошқармаси раҳбари Билл Бернс “Вагнер” раҳбари Евгений Пригожинга маслаҳат берди. Бу ҳақда BBC хабар берди.

Бернснинг сўзларига кўра, ҳозирда Россия президенти Владимир Путин исён сабабли “Вагнер” раҳбарига нисбатан қандай чора кўриш бўйича вақтдан ютмоқда. Бернс сўнгги исён Путиннинг ҳокимият тизимидаги “жиддий заиф томонларини фош қилгани” ва у ҳали ҳам “Пригожиндан ўч олиши” мумкинлигини билдирди.

“Биз кўраётган нарса жуда мураккаб рақс”, — дея у бунга изоҳ берди.

Бернс “Вагнер” Африка, Ливия ва Сурия каби мамлакатларда Россия раҳбарияти учун ҳамон қадрли эканини, Путин “Вагнер”ни раҳбаридан ажратишга ҳаракат қилиши мумкинлигини айтди. 

“Путин — қасосни совуқ ҳолатда бериш яхши деб ҳисоблайдиган одам. Шахсий тажрибамга кўра, у қасос олишнинг тарафдори, шунинг учун Пригожин кейинги жазодан қутулиб қолса, ҳайрон бўламан”, — деди Бернс.

Шунингдек, у Байденнинг Пригожин овқатини ейишдан олдин уни текшириб кўриши кераклиги ҳақидаги сўзларини қўллаб-қувватлади. 

“Агар мен Пригожиннинг ўрнида бўлсам, дегустаторимни ишдан бўшатмаган бўлардим”, — деди Бернс.