Австралия ТИВ маълумотларига кўра, мамлакат Россия Федерациясининг мудофаа, технология ва энергетика соҳаларидаги 35 та ташкилотига, шунингдек, Россия ва Беларусдан 10 нафар шахсга нисбатан санкциялар жорий қилди.
“Жорий санкциялар Россия учун иқтисодий ва стратегик аҳамиятга эга бўлган юридик ва жисмоний шахсларга қарши қаратилган”, — дейилади ташқи ишлар вазири ёрдамчиси Том Уотс томонидан тайёрланган баёнотда.
Аниқлик киритилишича, санкциялар рўйхатига мамлакат қуролли кучларига илғор технологиялар, электроника ва жиҳозлар етказиб берувчи, атом энергетикаси ва Арктика ресурсларини қазиб олиш билан шуғулланувчи Россия компаниялари киритилган. Бундан ташқари, Россия Федерациясининг энг йирик мудофаа корхоналари, жумладан, ҳарбий вертолётлар ишлаб чиқарувчи “Россия вертолётлари” ва унинг бош директори Николай Колесов ҳам санкциялар остида қолди.
Жисмоний шахслар орасида, жумладан, бош вазирнинг биринчи ўринбосари Андрей Белоусов ва бош вазир ўринбосари Дмитрий Чернишенкога нисбатан санкциялар қўлланган. Шунингдек, рўйхатда “юқори мартабали Беларусь ҳарбий амалдорлари” ҳам бор.
Австралия Ташқи ишлар вазирлиги маълумотларига кўра, чеклов чоралари халқаро ҳамкорлар билан яқиндан келишилган ҳолда қабул қилинган.
Изоҳ (0)