Норматив-ҳуқуқий ҳужжатлар лойиҳалари муҳокамаси порталига Вазирлар маҳкамасининг “Қорақалпоғистон Республикасида маҳаллаларни қўллаб-қувватлаш жамғармасини ташкил этиш тўғрисида”ги қарори лойиҳаси муҳокамага қўйилган.
Лойиҳага кўра, ташкил этилган жамғармага ҳудудларни ижтимоий-иқтисодий ривожлантириш учун назарда тутилган маблағлар ҳисобидан 2023 йил давомида 452 та маҳалланинг ҳар бирига тўғридан тўғри 500 миллион сўмдан ажратиш кўзда тутилган.
Қуйидагилар Жамғарма маблағларидан фойдаланишнинг асосий йўналишлари этиб белгиланмоқда:
- маҳаллалар ҳудудларидаги ички йўллар, электр энергияси ва табиий газ тармоқлари, ичимлик ва оқова сув тизимларини таъмирлаш ва тиклаш;
- маҳалла инфратузилмасини ривожлантириш, ободонлаштириш ва кўкаламзорлаштириш ишларини амалга ошириш;
- маҳаллалардаги “маҳалладаги кўчабоши ва уйбоши”ларини рағбатлантириш;
- ижтимоий ҳимояга мухтож ва кам таъминланган оилаларга моддий томондан кўмаклашиш ҳамда уларнинг турар жойларини таъмирлаш;
- фуқаролар йиғинлари бинолари ва улар жойлашган ҳудудларда спорт майдончалари, нуронийлар маскани, ёшлар маркази, болалар майдончалари, кутубхона, маданият марказларини қуриш, йирик ва майда таъмирлаш ҳамда уларни инвентар, мебел, компьютер жиҳозлари ва бошқа ускуналар билан таъминлаш;
- “Яшил макон” умуммиллий лойиҳаси доирасида маҳалла боғларини ташкил қилиш;
- маҳаллани кичик бизнес ва тадбиркорликни ривожлантириш марказига айлантириш бўйича “Маҳалла стартапи” ва микролойиҳаларни амалга ошириш;
- маҳаллада жиноятчиликнинг олдини олиш ҳамда маҳалла ободлигига ўз ҳиссасини қўшган ташаббускор фуқароларни рағбатлантириш;
- қонунчилик ҳужжатларида тақиқланмаган бошқа мақсадлар учун.
Қарор лойиҳасига илова сифатида Қорақалпоғистон Республикаси Вазирлар Кенгаши ҳузуридаги Маҳаллаларни қўллаб-қувватлаш жамғармаси маблағларини шакллантириш ва улардан фойдаланиш тартиби тўғрисидаги низом тақдим этилган. Унга кўра, жамғарма маблағлари фақат Қорақалпоғистон Республикаси Жўқорғи Кенгеси президиуми қарори асосида ажратилади.
Изоҳ (0)