Boney М ва Доктор Альбандан Оtаwаn гуруҳигача: Андижонда жаҳон юлдузлари иштирокида шоу-концерт бўлиб ўтди

Андижон вилоятининг Хонобод шаҳрида илк маротаба ташкил этилган “Дунё садолари” халқаро миллий эстрада фестивалининг очилиш маросими бўлиб ўтди. Тадбир давомида жаҳон эстрада юлдузлари иштирокида шоу-концерт ташкил этилди. Бу ҳақда “Дарё” мухбири Умиджон Мамарасулов хабар бермоқда.

Фестивальнинг очилиш маросимида сўзга чиққан Маданият ва туризм вазири Озодбек Назарбеков, Андижон вилояти ҳокими Шуҳратбек Абдураҳмоновлар жорий йилда илк маротаба ўтказилаётган мазкур халқаро тадбирда Россия, Франция, Германия, Швеция, Чехия, Болгария, Латвия, Польша, Греция, Сербия сингари дунёдаги бир қатор давлатларнинг эстрада санъати гуруҳлари, хонандалари иштирок этиб, ўзларининг миллий санъатларини намойиш этишини билдирди.

Байрам тадбирида Қорақалпоғистон Республикаси ва вилоятлар бадиий жамоалари, эстрада хонандалари томонидан ўз ҳудудларини тараннум этувчи қўшиқлар янгради. Шунингдек, иштирокчилар Boney М диско-гуруҳи чиқишларидан баҳраманд бўлди.

Тадбир якунида фестиваль доирасида ўтказилган ёш эстрада хонандалари республика кўрик-танлови ғолибларига Маданият ва туризм вазирлиги ҳамда Андижон вилояти ҳокимлиги томонидан пул маблағлари ҳамда эсдалик совғалари топширилган. Олий ўрин эгасига эса шунингдек Турксой ташкилотининг статуэткаси ҳам топширилган.

Фестивальнинг очилиш маросимидан сўнг Хонобод шаҳар ҳокимлиги олдида тайёрланган саҳнада жаҳон эстрада юлдузлари Доктор Альбан, Boney М диско-гуруҳи ҳамда Оtаwаn гуруҳи иштирокида шоу-концерт ўтказилди.

Ушбу тадбирда 10 мингга яқин иштирокчи хонандаларнинг жонли ижроларидан баҳраманд бўлди.

Фестиваль доирасида гастрономик кўча ташкил қилинган бўлиб, вилоятлардан келган моҳир ошпазлар томонидан ҳар бир ҳудуднинг ўзига хос таомлари тайёрланмоқда. Бундан ташқари шаҳарнинг Марказий маданият ва истироҳат боғида ажратилган махсус павильонларда Қорақалпоғистон Республикаси ҳамда вилоятлардан келган ижодий жамоалар ва хонандалар ўз миллий қўшиқчилик санъатини намойиш этмоқда.

“Дунё садолари” халқаро миллий эстрада фестивали 20 июль куни якунига етади.