Normativ-huquqiy hujjatlar loyihalari muhokamasi portaliga Vazirlar mahkamasining “Qoraqalpog‘iston Respublikasida mahallalarni qo‘llab-quvvatlash jamg‘armasini tashkil etish to‘g‘risida”gi qarori loyihasi muhokamaga qo‘yilgan.
Loyihaga ko‘ra, tashkil etilgan jamg‘armaga hududlarni ijtimoiy-iqtisodiy rivojlantirish uchun nazarda tutilgan mablag‘lar hisobidan 2023-yil davomida 452 ta mahallaning har biriga to‘g‘ridan to‘g‘ri 500 million so‘mdan ajratish ko‘zda tutilgan.
Quyidagilar Jamg‘arma mablag‘laridan foydalanishning asosiy yo‘nalishlari etib belgilanmoqda:
- mahallalar hududlaridagi ichki yo‘llar, elektr energiyasi va tabiiy gaz tarmoqlari, ichimlik va oqova suv tizimlarini ta’mirlash va tiklash;
- mahalla infratuzilmasini rivojlantirish, obodonlashtirish va ko‘kalamzorlashtirish ishlarini amalga oshirish;
- mahallalardagi “mahalladagi ko‘chaboshi va uyboshi”larini rag‘batlantirish;
- ijtimoiy himoyaga muxtoj va kam ta’minlangan oilalarga moddiy tomondan ko‘maklashish hamda ularning turar joylarini ta’mirlash;
- fuqarolar yig‘inlari binolari va ular joylashgan hududlarda sport maydonchalari, nuroniylar maskani, yoshlar markazi, bolalar maydonchalari, kutubxona, madaniyat markazlarini qurish, yirik va mayda ta’mirlash hamda ularni inventar, mebel, kompyuter jihozlari va boshqa uskunalar bilan ta’minlash;
- “Yashil makon” umummilliy loyihasi doirasida mahalla bog‘larini tashkil qilish;
- mahallani kichik biznes va tadbirkorlikni rivojlantirish markaziga aylantirish bo‘yicha “Mahalla startapi” va mikroloyihalarni amalga oshirish;
- mahallada jinoyatchilikning oldini olish hamda mahalla obodligiga o‘z hissasini qo‘shgan tashabbuskor fuqarolarni rag‘batlantirish;
- qonunchilik hujjatlarida taqiqlanmagan boshqa maqsadlar uchun.
Qaror loyihasiga ilova sifatida Qoraqalpog‘iston Respublikasi Vazirlar Kengashi huzuridagi Mahallalarni qo‘llab-quvvatlash jamg‘armasi mablag‘larini shakllantirish va ulardan foydalanish tartibi to‘g‘risidagi nizom taqdim etilgan. Unga ko‘ra, jamg‘arma mablag‘lari faqat Qoraqalpog‘iston Respublikasi Jo‘qorg‘i Kengesi prezidiumi qarori asosida ajratiladi.
Izoh (0)