Россия президенти матбуот котиби Дмитрий Песков АҚШнинг Қирғизистонга қарши қўллаши мумкин бўлган санкцияларига муносабат билдирди. Бу ҳақда “Российская газета” хабар берди.
Песковга кўра, Кремль АҚШнинг эҳтимолий санкциялари сабабли Россия ва Қирғизистон ўртасидаги савдо-иқтисодий алоқаларда хавф-хатар юзага келишини кўрмаяпти.
“Қирғизистон бизнинг яқин ҳамкоримиз ва иттифоқчимиз эканидан ташқари, бизни илғор интеграция жараёнларидаги иштирокимиз ҳам бирлаштиради. Гап Евросиё иқтисодий иттифоқи ҳақида кетмоқда. Айнан шу интеграция Қирғизистоннинг ўзига катта фойда келтиради”, — деди у журналистларга
Кремль расмийси Қирғизистон иқтисодиёти, албатта, ушбу интеграция жараёнининг янада ривожланишидан манфаатдор эканини таъкидлади.
“Биз Қирғизистон билан ўзимиз учун юксак қадрлайдиган икки томонлама муносабатларимизни, шунингдек, қўшма интеграциянинг барча форматларини янада ривожлантириш ниятидамиз”, — деди Песков.
АҚШнинг Қирғизистонга қарши эҳтимолий санкциялари
АҚШ Қирғизистонга нисбатан санкциялар жорий этишга тайёрланмоқда. Вашингтондаги маълумотларга кўра, Россияга Хитойдан дрон сингари санкциялар остидаги маҳсулотлар Қирғизистон орқали етказиб берилади.
“Россия қўшинларининг Украинага бостириб кириши вақтида ва ундан кейин қўйилган санкциялардан сўнг Россия ва Марказий Осиё давлатлари ўртасидаги савдо ҳажми ғайритабиий даражада ўсди. Россияга бевосита экспорт қилиш санкциялар билан чекланган маҳсулотлар Москвага Марказий Осиё давлатлари, жумладан, Қирғизистон орқали етказиб берилади”, — деб ёзади The Washington Post.
The Washington Post нашри изоҳ олиш учун Қирғизистоннинг АҚШдаги элчихонаси билан боғланган. Улар нашрга мамлакат ноқонуний савдога қарши курашга қатъий содиқ эканини таъкидлаган.
Изоҳ (0)