Instagram ижтимоий тармоғида қарийб 1 миллион обуначига эга бўлган блогер “Асад-алго” вафот этди. Бу ҳақда унинг яқин дўсти Instagram’даги саҳифаси орқали маълум қилди.
Йигит 19 июль куни соат 20:30 да жонлантириш бўлимида вафот этгани айтилмоқда — миясини операция қилиш вақтида юраги тўхтаб қолган.
Бош прокуратура матбуот котибининг ёзишича, 20 ёшли блогер вафот этгани ҳолати юзасидан терговга қадар текширув ҳаракатлари олиб борилмоқда.
Марҳумнинг ўлим сабабларини аниқлаш мақсадида суд-тиббиёт экспертизаси тайинланган.
“Натижаси бўйича қонуний қарор қабул қилиниши таъминланади”, — дейилади хабарда.
“Митти вайн” тахаллуси билан танилган 27 ёшли вайнер Фарҳод Маннопов 5 март куни Тошкентнинг Чилонзор туманида жойлашган клиникалардан бирида вафот этганди. Ижтимоий тармоқларда Фарҳод Манноповнинг ўлимига наркозни кўп бериб юбориш сабаб бўлгани ҳақида хабарлар тарқалган. Бош прокуратура блогернинг вафоти юзасидан жиноят иши қўзғатилгани, иш доирасида шифокорлар ушлангани ёки қамоққа олингани ҳақида тарқалаётган хабарлар асоссиз ва ҳақиқатга тўғри келмаслигини маълум қилган эди.
Изоҳ (0)