Бухоро вилоятида пул эвазига аукцион орқали ер ажратиб беришни ваъда қилган ҳоким ёрдамчиси ва туман ҳокимлиги ходими қўлга олинди. Бу ҳақда “Замон” информацион дастурида маълум қилинди.
Қайд этилишича, Бухоро вилояти ИИБ бошлиғига ариза билан мурожаат қилган фуқаро Когон тумани “Нурафшон” маҳалласининг ҳоким ёрдамчиси ўзининг таниши орқали ҳокимлик балансида бўлган захира ерларидан жами 40 гектар ер майдонини электрон аукцион орқали 500 миллион сўмга сотиб олиб беришини айтиб, эвазига 10 минг АҚШ доллари талаб қилган.
Аризага асосан Бухоро вилояти ИИБ Тергов-қидирув хизмати ЖҚБ Коррупция ва иқтисодий жиноятларга қарши курашиш бўлими ходимлари томонидан тезкор тадбир ўтказилган. Тадбирда ҳоким ёрдамчиси ва унинг таниши Бухоро шаҳридаги савдо дўконида ариза муаллифидан талаб қилган пулдан 5 минг долларни олаётганида ушланган.
Шундан сўнг, уларнинг берган кўрсатмасига асосан тезкор тадбир давом эттирилиб, Бухоро тумани “Работақалъа” маҳалласида Когон тумани ҳокимлиги қишлоқ хўжалиги бўлимида ишловчи шахс 5 минг долларни олганда ашёвий далиллар билан қўлга олинган.
Ҳозирда ҳолат юзасидан терговга қадар текширув ҳаракатлари олиб борилмоқда.
Пора билан қўлга тушган ҳоким ёрдамчилари
Май охирларида Навоий вилоятининг Хатирчи туманида ҳоким ёрдамчиси пора олаётганида ушланганди. Фуқаро 25 миллион сўм кредит олиш ва тадбиркорликни бошлаш мақсадида маҳалланинг ҳоким ёрдамчисига учрашган. Аммо ҳоким ёрдамчиси унга тавсиянома текинга берилмаслигини айтган. Бироқ у фуқарога “ёрдам бериш” учун 100 доллар ва 900 минг сўм олаётганида қўлга тушган.
Апрель ойида эса Қашқадарёнинг Яккабоғ ва Шаҳрисабз туманларида икки нафар ҳоким ёрдамчисига жиноят иши қўзғатилганди. Улардан бири 1,7 миллиард сўмлик имтиёзли кредит маблағларини талон-торож қилган бўлса, бошқаси ер билан боғлиқ ноқонуний ишга аралашган.
Изоҳ (0)