Bugun (20-iyul kuni) oliy taʼlim muassasalarining bakalavriat taʼlim yo‘nalishlariga kirish test sinovlarida ishtirok etish uchun abituriyentlarni ro‘yxatga olish yakunlanadi. Bu haqda Bilimni baholash agentligi maʼlum qildi.
Foto: “Daryo” / Madina Nurman
Abituriyentlar bugun soat 23:59 ga qadar my.uzbmb.uz yoki my.gov.uz saytlari orqali onlayn ro‘yxatdan o‘tishlari yoki tanlagan taʼlim yo‘nalishlarini o‘zgartirishlari mumkin.
To‘lovdan ozod qilinganlar toifasiga kirmaydigan abituriyentlar 21-iyul kuni soat 23:59 gacha to‘lovni amalga oshirishlari mumkin bo‘ladi.
So‘nggi maʼlumotlarga ko‘ra, 19-iyul soat 20:00 holatiga OTMlarga kirish uchun 882 913 nafar abituriyent onlayn ro‘yxatdan o‘tgan. Eng ko‘p ro‘yxatdan o‘tgan abituriyentlar Qashqadaryo viloyati (103 ming 972 nafar) hissasiga to‘g‘ri kelmoqda. Keyingi o‘rinlardan Samarqand (99 210 nafar), Farg‘ona (83 409 nafar), Toshkent (76 884 nafar) va Surxondaryo (72 883 nafar) viloyatlari joy olgan.
Eng ko‘p abituriyent ro‘yxatdan o‘tgan OTMlar (birinchi taʼlim yo‘nalishiga nisbatan):
- O‘zbekiston milliy universiteti — 32 630 nafar;
- Farg‘ona davlat universiteti — 26 250 nafar;
- Toshkent davlat transport universiteti — 26 136 nafar;
- Toshkent davlat pedagogika universiteti — 25 473 nafar;
- Toshkent axborot texnologiyalari universiteti — 24 936 nafar.
Taʼlim shakllari bo‘yicha taqqoslaganda abituriyentlarning 530 195 nafari kunduzgi, 324 213 nafari sirtqi, 21 861 nafari kechki va 6 644 nafari masofaviy taʼlim shakliga kirish uchun hujjat topshirgan.
Izoh (0)