Камбағалликни қисқартириш ва бандлик вазирлиги “Касаначиларни жалб қилган тадбиркорлик субъектларига давлат мулки объектлари ижара тўловларини 50 фоизга камайтирган ҳолда ижарага бериш тартиби тўғрисидаги низомни тасдиқлаш ҳақида”ги идоралараро буйруқ лойиҳасини муҳокамага қўйди.
Ҳужжат лойиҳасига кўра, 2023 йил 1 мартдан 2026 йил 1 январга қадар уч ойдан ортиқ муддатга 30 нафардан ортиқ касаначиларни белгиланган тартибда жалб қилган ва касаначилик асосида ишлаб чиқарилган маҳсулотларни (кўрсатилган хизматларни) реализация қилишдан олган даромадлари жами даромади 60 фоизидан кўпроғини ташкил этган тадбиркорлик субъектларига давлат мулки объектлари истисно тариқасида электрон савдоларни ўтказмасдан ижара тўловларини 50 фоизга камайтирган ҳолда ижарага берилади.
Бунда:
а) давлат мулки объектининг имтиёз қўлланиладиган энг кўп майдони қуйидагича белгиланади:
- Тошкент шаҳрида – 220 квадрат метр;
- Нукус шаҳри ва вилоят марказларида – 240 квадрат метр;
- туман марказларида – 260 квадрат метр;
- бошқа ҳудудларда – 280 квадрат метр.
б) мазкур имтиёз:
- ўттиз нафардан ортиқ касаначилар жалб қилинган даврга татбиқ этилади;
- Тошкент, Нукус шаҳарлари ва вилоят марказлари ҳамда бошқа ҳудудлар бўйича тегишлича ҳудудий зона коэффициенти энг юқори бўлган объектларга нисбатан қўлланилмайди.
Касаначилар билан шартнома бекор қилиниши оқибатида белгиланган шартлар бузилган тақдирда, имтиёз асосида ижарага бериш шартлари бузилиши аниқланган ойдан кейинги ойдан бошлаб имтиёз бекор қилинади. Мазкур имтиёзлар қонунчилик ҳужжатларига мувофиқ ижара тўловларида имтиёзга эга бўлган тадбиркорлик субъектларига татбиқ қилинмайди.
Ўзбекистонда касаначилик
Февраль ойида Шавкат Мирзиёев Андижонга ташрифи давомида Шаҳрихон туманидаги Elegant shoes and корхонаси фаолияти билан танишганди. Шунда давлат раҳбари чарм саноатига касаначилик асосида уйда ўтирган аёлларни ҳам жалб қилиш зарурлигини қайд этган эди.
Ундан олдин эса Ўзбекистонда “Касаначиликни ташкил этган тадбиркорлик субъектларини янада қўллаб-қувватлаш чора-тадбирлари тўғрисида” Вазирлар Маҳкамаси қарори қабул қилингани хабар берилганди.
Изоҳ (0)