Наманган вилояти мактабгача ва мактаб таълими бошқармаси рўмол ўраган ўқувчи қизни ҳақорат қилган мактаб директори воқеасига муносабат билдирди.
Ижтимоий тармоқда мактаб директори ўқувчи қиз рўмол ўраб келгани сабаб уни ҳақоратли сўзлар билан сўккани акс этган видео тарқалиб, муҳокамаларга сабаб бўлди.
Наманган вилояти Мактабгача ва мактаб таълими бошқармаси ишчи гуруҳи томонидан ҳолат ўрганилган. Ўрганишлар давомида видеода акс этган ҳолат 2022 йил сентябрь ойида Мингбулоқ туманидаги 43-умумий ўрта таълим мактабида содир бўлгани аниқланган. Видео эса 2023 йил июль ойида ижтимоий тармоқларда тарқалган.
Ўрганиш якунига кўра, мактаб директори билан тузилган меҳнат шартномаси бекор қилинган.
Мактабга рўмол ўраб келиш мумкинми?
2021 йилда собиқ Халқ таълими вазирлиги ўқувчи қизларнинг мактабга ҳижобда боришлари мумкинлиги ҳақидаги саволларга муносабат билдириб, халқ таълими вазирининг 2020 йил 28 майдаги 131-сон буйруғи билан тасдиқланган мактабларнинг ички тартиб ва одоб-ахлоқ қоидаларининг 8-бандига кўра ўқувчилар белгиланган мактаб формасида келишлари шартлигини эслатганди.
Орадан кўп ўтмай халқ таълими вазири лавозимида ишлаган Шерзод Шерматов умумтаълим мактаблари директорлари, ўқитувчилар ва ота-оналар иштирокида очиқ мулоқот ўтказилган эди. Мулоқот давомида миллий қадриятларни инобатга олган ҳолда, қизларга истисно тариқасида мактабда оқ ва очиқ рангларда миллий рўмол (бошнинг орқа томонига ўралган ҳолатда) ва дўппида бўлишларига рухсат этилиши маълум қилинган.
Изоҳ (0)