Instagram ижтимоий тармоғида хонанда Канизани ҳақорат қилиб изоҳлар ёзган талаба йигит жавобгарликка тортилди. Бу ҳақда “Марказий студия” информацион дастурида маълум қилинди.
Қайд этилишича, жиноят ишлари бўйича Яккасарой туман судида Канизани ҳақорат қилган йигитга оид иш кўриб чиқилган. Канизанинг сўзларига кўра, айбланувчи бир неча ойдан буён уни Instagram саҳифаси орқали турли сўзлар билан ҳақорат қилиб келган.
Ҳолат бўйича эса тегишли органларга қилинган мурожаатлардан самара бўлмаган, хонанданинг “Нега қонунлар ишламаяпти?” мазмунидаги видеосидан сўнг айбланувчи судга жалб қилинган.
“‘Подписка’ қилмаганман, stories’ларини кўрганман. Танимайман, икки марта ёзганман”, — дейди айбланувчи.
20 ёшли судланувчи асли қашқадарёлик бўлиб, ҳозирда Тошкент давлат техника университети талабаси ҳисобланади. У суд мажлисида қилган ишига иқрорлигини ва қаттиқ пушаймонлигини билдирди.
Суд қарори билан айбланувчи Маъмурий жавобгарлик тўғрисидаги кодекснинг 41-моддаси (ҳақорат қилиш) билан айбли деб топилди ва унга БҲМнинг 20 баробари (6,6 миллион сўм) миқдорида жарима жазоси тайинланди.
Февраль охирларида хонанда Каниза ижтимоий тармоқлардаги ахлоқсиз видеолари учун лицензиясидан бир ойга маҳрум бўлганди. Кейинроқ у мазкур ҳолатга муносабат билдириб, “Ўзбекконцерт”ни танқид қилган эди.
Изоҳ (0)