Қорақалпоғистон Республикасида браконьерлар тузоғига тушиб қолган икки буғу нобуд бўлди, деб хабар беради Экология, атроф-муҳитни муҳофаза қилиш ва иқлим ўзгариши вазирлиги.
Маълум қилинишича, 16 июль куни соат 06:00 да Қуйи Амударё давлат биосфера резерватининг Беруний давлат ўрмон хўжалиги участкасида иккита Бухоро буғусининг жасади топилган. Улар браконьерлар томонидан қўйилган тузоққа тушган.
Ҳайвонларнинг нобуд бўлишига алоқадор шахсларни аниқлаш мақсадида Қуйи Амударё давлат биосфера резервати бошқармаси инспекторлари воқеа жойида пистирма ташкил қилган. Бир неча соат ўтгач, ниқобли икки номаълум шахс пистирмага яқинлашган, аммо инспекторларни пайқаб, воқеа жойидан қочиб кетган.
Қуйи Амударё қўриқхонаси инспекторларининг ўтказган тезкор ҳаракатлари натижасида Беруний тумани ИИБ ходимлари билан ҳамкорликда воқеага алоқадор браконьерлар — Беруний тумани Бийбозор қишлоғида яшовчи 30 ёшли Ш.А., 33 ёшли Р.Б. ва 38 ёшли И.Д. қўлга олинган.
Ҳозирда ушбу шахсларга нисбатан Беруний тумани ИИБ томонидан ҳайвонларнинг нобуд бўлганлиги факти юзасидан терговга қадар текширув ишлари олиб борилмоқда.
Июнь бошларида Қорақалпоғистонда браконьер Қизил китобга киритилган Бухоро буғусини овлаб, қочиб кетишга уринганида тўхтатиб қолинганди. Бир неча кун олдин эса Бухорода экология бўлими бошлиғига ўқ узган браконьерлар ушланган эди.
Изоҳ (0)