Kambag‘allikni qisqartirish va bandlik vazirligi “Kasanachilarni jalb qilgan tadbirkorlik subyektlariga davlat mulki obyektlari ijara to‘lovlarini 50 foizga kamaytirgan holda ijaraga berish tartibi to‘g‘risidagi nizomni tasdiqlash haqida”gi idoralararo buyruq loyihasini muhokamaga qo‘ydi.
Hujjat loyihasiga ko‘ra, 2023-yil 1-martdan 2026-yil 1-yanvarga qadar uch oydan ortiq muddatga 30 nafardan ortiq kasanachilarni belgilangan tartibda jalb qilgan va kasanachilik asosida ishlab chiqarilgan mahsulotlarni (ko‘rsatilgan xizmatlarni) realizatsiya qilishdan olgan daromadlari jami daromadi 60 foizidan ko‘prog‘ini tashkil etgan tadbirkorlik subyektlariga davlat mulki obyektlari istisno tariqasida elektron savdolarni o‘tkazmasdan ijara to‘lovlarini 50 foizga kamaytirgan holda ijaraga beriladi.
Bunda:
a) davlat mulki obyektining imtiyoz qo‘llaniladigan eng ko‘p maydoni quyidagicha belgilanadi:
- Toshkent shahrida – 220 kvadrat metr;
- Nukus shahri va viloyat markazlarida – 240 kvadrat metr;
- tuman markazlarida – 260 kvadrat metr;
- boshqa hududlarda – 280 kvadrat metr.
b) mazkur imtiyoz:
- o‘ttiz nafardan ortiq kasanachilar jalb qilingan davrga tatbiq etiladi;
- Toshkent, Nukus shaharlari va viloyat markazlari hamda boshqa hududlar bo‘yicha tegishlicha hududiy zona koeffitsiyenti eng yuqori bo‘lgan obyektlarga nisbatan qo‘llanilmaydi.
Kasanachilar bilan shartnoma bekor qilinishi oqibatida belgilangan shartlar buzilgan taqdirda, imtiyoz asosida ijaraga berish shartlari buzilishi aniqlangan oydan keyingi oydan boshlab imtiyoz bekor qilinadi. Mazkur imtiyozlar qonunchilik hujjatlariga muvofiq ijara to‘lovlarida imtiyozga ega bo‘lgan tadbirkorlik subyektlariga tatbiq qilinmaydi.
O‘zbekistonda kasanachilik
Fevral oyida Shavkat Mirziyoyev Andijonga tashrifi davomida Shahrixon tumanidagi Elegant shoes and korxonasi faoliyati bilan tanishgandi. Shunda davlat rahbari charm sanoatiga kasanachilik asosida uyda o‘tirgan ayollarni ham jalb qilish zarurligini qayd etgan edi.
Undan oldin esa O‘zbekistonda “Kasanachilikni tashkil etgan tadbirkorlik subyektlarini yanada qo‘llab-quvvatlash chora-tadbirlari to‘g‘risida” Vazirlar Mahkamasi qarori qabul qilingani xabar berilgandi.
Izoh (0)