“Ўзбекистон темир йўллари” АЖ делегацияси Покистон ва Афғонистон темир йўл маъмуриятлари билан биргаликда Трансафғон темир йўл линиясини қуриш бўйича музокараларнинг якуний босқичи ўтказилмоқда. Бу ҳақда компания матбуот хизмати хабар берди.
Қайд этилишича, минтақа учун муҳим аҳамиятга эга бўлган ушбу лойиҳа Ўзбекистон, Афғонистон ва Покистон ўртасидаги иқтисодий алоқаларни мустаҳкамлашда муҳим бўғин ҳисобланади.
Трансафғон темир йўл линияси минтақада транспорт ҳамкорлиги ва ривожланиши учун янги истиқболларни очадиган кенг кўламли лойиҳадир. Афғонистон ҳудуди орқали Ўзбекистон ва Покистон ўртасида тўғридан тўғри темир йўл қатнови йўлга қўйилиб, янада самарали савдо муносабатлари ва логистика таъминланади.
“Жорий музокараларда делегациялар лойиҳанинг турли жиҳатларини, жумладан, молиялаштириш механизмлари, қурилиш масалалари, техник тафсилотлар ва амалга ошириш муддатларини муҳокама қилмоқда. Учала томон ҳам ушбу лойиҳага юқори қизиқиш билдириб, ўзаро манфаатли ҳамкорликка тайёр. Муҳим лойиҳани муваффақиятли амалга оширишга имкон берадиган мақбул ечимларни топишга ҳар томонлама интилинмоқда”, — дейилади хабарда.
Термиз—Мозори Шариф—Кобул—Пешовар трансафғон темир йўли лойиҳасининг тахминий қиймати 5 миллиард долларни ташкил этади. Узунлиги 600 километр бўлган темир йўл Марказий Осиё мамлакатлари учун Покистоннинг йирик денгиз портларига чиқиш йўлини очиб беради. Бу эса минтақавий алоқа ва савдони ривожлантиришга хизмат қилади.
Шавкат Мирзиёев ушбу трансафғон темир йўлини аср лойиҳаси деб атаган. Темир йўл қурилиши 2022 йилнинг сентябрь ойида бошланиши режалаштирилганди. Бироқ режалар ўзгариши сабаб бу амалга ошмади. Февраль ойида Ўзбекистон ва Покистон Марказий ва Жанубий Осиёни Афғонистон орқали боғлайдиган ва Покистон портларига олиб чиқадиган темир йўл қурилиши лойиҳасини тезлаштиришга келишгани маълум бўлганди.
Изоҳ (0)