Мисрдан гепатит C га қарши дори воситаларининг ўнинчи партияси Ўзбекистонга етказилди

Мисрдан С гепатитига қарши “Даклатасвир” дори воситасининг саккизинчи партияси 15 июль куни Тошкентга етказиб берилди, деб хабар бермоқда “Дунё” АА.

Қайд этилишича, мазкур инсонпарварлик ёрдамида Ўзбекистон президентининг 2023 йил 20–21 февраль кунлари Мисрга амалга оширилган расмий ташрифи давомида эришилган келишувлар ҳамда давлат раҳбарининг Гепатит C касаллигини 100 фоиз давлат ҳисобидан даволаш бўйича сайловолди ташаббусининг ижроси доирасида Миср соғлиқни сақлаш вазирлиги билан олиб борилган музокаралар натижасида амалга оширилди.

Умумий ҳажми 114 қутида 3 минг донадан ортиқ “Даклатасвир” дори воситалари Ўзбекистон Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморларга тақсимланади.

Таъкидланишича, Миср гепатит B ва C вирусларига қарши курашда дунё миқёсида сезиларли муваффақиятларга эришган.

Миср Соғлиқни сақлаш вазирлиги маълумотига кўра, мамлакат аҳолиси ушбу касалликдан бутунлай фориғ бўлган ва бу ҳақида вазир Халид Абдуғаффор 2023 йилнинг 21–30 май кунлари Женевада бўлиб ўтган ЖССТнинг 76-сессиясида маълум қилди. Халқаро ташкилот мутахассис ва экспертлари Мисрнинг ушбу йўналишдаги ютуқларини ўрганди ва жорий йилнинг июнь ойида тегишли ҳисобот эълон қилиши ҳамда гепатит C вируси батамом барҳам топилгани ҳақидаги шаҳодатнома Миср ҳукуматига тақдим этилиши кутилмоқда.

Мутахассисларнинг айтишича, Миср ҳукумати мазкур ютуқларга эришиш учун “100 миллион соғлом ҳаёт” миллий дастурини ишлаб чиқиб, уни муваффақиятли амалга оширмоқда. Бунда асосий эътибор дунёнинг машҳур фармацевтика компаниялари билан яқиндан ҳамкорлик алоқаларини ўрнатиш ва кенгайтиришга қаратилмоқда.

Маълумот учун, Мисрдан С гепатитига қарши дори воситалари 29 апрелдан буён бир неча партияларда олиб келинмоқда.