Наманганда тадбиркорга тегишли тўлов терминалини ўғирлаб кетган йигитлар қўлга олинди. Бу ҳақда Наманган вилояти ИИБ ахборот хизмати хабар берди.
Маълум қилинишича, 4 июль куни Чуст туманида яшовчи фуқаро Наманган шаҳар ИИО ФМБ бошлиғи номига ариза билан мурожаат қилиб, шаҳарнинг “Ибрат” маҳалласида жойлашган тадбиркорлик субъектига ўрнатилган Paynet тўлов терминали (инфокиоск) ўғирлаб кетилганини билдирган.
Қайд этилишича, нархи 19 миллион сўмни ташкил этган мазкур тўлов терминали ичида 4 миллион 378 минг сўм бўлган.
Аризага асосан олиб борилган тезкор-қидирув ҳаракатлари натижасида мазкур жиноятни Наманган шаҳрида яшовчи 21 ёшли икки шахс содир этгани аниқланган. Улар тўлов терминали ичидаги пулларни олиб бўлгач, ускунани Шимолий Фарғона каналига ташлаб юборган.
Ҳолат бўйича Наманган шаҳар ИИО ФМБ томонидан Жиноят кодексининг 169-моддаси (ўғрилик) 3-қисми билан жиноят иши қўзғатилиб, ҳозирда тергов ҳаракатлари олиб борилмоқда. Аниқланишича, ўғирликни содир этган шахслардан бири аввал ҳам Жиноят кодексининг худди шу моддаси билан судланган.
Инфокиоск ўғрилари
2021 йилда бир ҳафта ичида Тошкентнинг Яшнобод туманида 7 та тўлов терминали ўғирланган эди. Кейинроқ гумондаги шахслар қўлга олинган. Улар бундан аввал Жиноят кодексининг тегишли моддалари билан жазо муддатини ўтаб чиққани маълум бўлганди.
Изоҳ (0)