Ижтимоий тармоқларда Фарғона вилоятида йигит кўчада қизни уриб, тепгани акс этган видеолавҳа тарқалди. Вилоят Ички ишлар бошқармаси ҳолатга муносабат билдирди.
Аниқланишича, 25 июнь куни Данғара туманида яшовчи, ўзаро таниш бўлган фуқаролар А.Д. (йигит) ва Н.Т. (қиз) ўртасида рашк туфайли келишмовчилик юзага келган. Оқибатда «Навбаҳор» маҳалласи ҳудудида А.Д. Н.Т.ни уриб, тепган. Сўнг воқеа жойидан кетиб қолган.
Ҳолат юзасидан судга оид тиббий экспертиза тайинланиб, Данғара туман ИИБ томонидан терговга қадар текширув ҳаракатлари олиб борилмоқда. Текширув якунига кўра қўшимча маълумот берилади.
Бундан аввал Жиззахда эр-хотин ўртасида рашк сабаб келиб чиққан жанжалда эрнинг отаси вафот этгани, Тошкентда севган қизини пичоқлаб, уни тинч қўйишини айтган йигитни ўлдирган эркак 15 йилга қамалгани, Тошкентда 21 ёшли йигит севган қизи тўғрисида «ёмон гаплар» айтган танишини пичоқлаб қўйгани ҳақида хабар берилган.
Изоҳ (0)