Олий Мажлис Қонунчилик палатаси мажлисида “Солиқни ҳисоблаб чиқариш тартибининг айрим қоидалари такомиллаштирилиши муносабати билан Ўзбекистон Республикасининг Солиқ кодексига қўшимча ва ўзгартиришлар киритиш тўғрисида”ги қонун лойиҳаси кўриб чиқилди. Бу ҳақда парламент қуйи палатаси матбуот хизмати хабар берди.
Кодекснинг 461 ва 462-моддаларига ўзгартиришлар киритиш орқали, тадбиркорлик субъектларининг бўш турган бинолари, фойдаланилмаётган ишлаб чиқариш майдонлари, шунингдек, қурилиши тугалланмаган объектларига нисбатан солиқ ставкасини ошириш тарзидаги таъсир чоралари қўлланилмаслиги муносабати билан ушбу тоифадаги солиқ тўловчиларни мажбурий тарзда қўшилган қиймат солиғи ва фойда солиғини тўлашга ўтказиш амалиёти бекор қилинмоқда.
Шунингдек, 2025 йил 1 январга қадар бўлган даврда эса электротехника тармоқ корхоналари ихтисослаштирилган марказларининг объектлари ва улар эгаллаган ер участкалари бўйича мол-мулк ва ер солиқларини ҳисобланган суммадан 1 фоиз, ижтимоий солиқни ҳам 1 фоизли ставка бўйича тўлаши назарда тутиляпти. Бунда, мазкур имтиёз электротехника тармоқ корхоналарининг ихтисослаштирилган марказларида илмий-тадқиқот ва тажриба-конструкторлик ишланмаларини амалга оширишдан олинган даромадлари жорий ҳисобот (солиқ) даври якунлари бўйича жами даромаднинг камида 60 фоизини ташкил қилганда татбиқ этилади.
Қонун лойиҳаси билан 2024 йил 1 январгача бўлган даврда жисмоний шахслар ер участкаларидан ҳужжатларсиз ёки ер участкасига бўлган ҳуқуқни тасдиқловчи ҳужжатларда кўрсатилганидан каттароқ ҳажмда фойдаланилганда белгиланган ер солиғи ставкаларини уч каррали ставкада солиқ ҳисоблаш тартиби тўхтатиб турилиши таклиф этилмоқда. Қонун лойиҳаси муҳокамалар ва савол-жавоблардан сўнг иккинчи ўқишда қабул қилинди.
Июль бошларида Ўзбекистон ҳукумати қарори билан “‘20 минг тадбиркор — 500 минг малакали мутахассис’ дастури доирасида тадбиркорлик субъектларига солиқ ва божхона имтиёзлари ҳамда преференсияларни қўллаш тартиби тўғрисида”ги низом қабул қилинганди.
Низомга кўра, Ижтимоий ҳимоя ягона реестрига киритилган фуқаролар камида 1 йил давомида иш билан таъминланган ва улар жами ишчилар сонининг камида 20 фоизини ташкил этган тадбиркорлар мол-мулк ва ер солиғи бўйича солиқ имтиёзларидан фойдаланиш ҳуқуқига эга бўлади.
Изоҳ (0)