Олий Мажлис Қонунчилик палатаси депутатлари ҳудудларни ва айрим соҳаларни ривожлантириш ҳамда инсофли солиқ тўловчилар ҳуқуқларини ҳимоя қилишга қаратилган тизимли чора-тадбирлар қабул қилингани муносабати билан Солиқ кодексига ўзгартиш ва қўшимчалар киритиш тўғрисидаги қонун лойиҳасини муҳокама қилди. Бу ҳақда парламент қуйи палатаси матбуот хизмати хабар берди.
Қайд этилишича, Ўзбекистон ҳудудлари ривожланишида тафовутлар сақланиб қолаётгани туман ва шаҳарларнинг шароити, салоҳияти ва имкониятлари бир-биридан фарқ қилиши натижасида аҳоли турмуш даражасини яхшилаш ва бандлигини таъминлашда айрим муаммолар юзага келмоқда. Бу эса ўз навбатида, ҳудудларнинг тадбиркорлик салоҳиятини оширишда қўшимча чоралар кўришни талаб этади.
Натижада республиканинг туман ва шаҳарларида уларнинг тоифасидан келиб чиқиб, тадбиркорлик субъектларига нисбатан солиқ имтиёзлари ва бошқа қўллаб-қувватлаш чораларини қўллаш тартибини жорий этиш тақозо этилмоқда.
Таклиф этилаётган қонун лойиҳаси билан республика ҳудудларининг тўртинчи тоифасига (40 та туман) киритилган туманларда фаолият юритадиган тадбиркорлар айланмадан олинадиган солиқни 3 фоиз ставкада, мол-мулк солиғи белгиланган энг кам қийматига ва ер солиғининг базавий ставкаларига 0,3 миқдорида, якка тадбиркорлар учун қатъий белгиланган солиқни 0,5 миқдорида камайтирувчи коэффициентларни қўллаган ҳолда тўлаш тартиби жорий қилиш таклиф қилинмоқда.
Шунингдек республика ҳудудларининг бешинчи тоифасига (20 та туман) киритилган туманларда фаолият юритадиган тадбиркорлар фойда, айланмадан олинадиган ва ижтимоий солиқни 1 фоиз миқдорида, мол-мулк ва ер солиғини ҳисобланган сумманинг 1 фоизи миқдорида тўлайди, шунингдек, якка тадбиркорлар қатъий белгиланган солиқни тўлашдан озод этиш кўзда тутиляпти.
Шу билан бирга, мамлакатда “яшил” иқтисодиётга ўтишни жадаллаштириш, электромобиллардан фойдаланишни оммалаштириш учун солиқ қонунчилигига электромобилларни қувватлантириш станцияларини ташкил қилган тадбиркорлик субъектлари фаолиятини рағбатлантирувчи нормалар киритилмоқда.
Мазкур қонун лойиҳасининг қабул қилиниши республика туман ва шаҳарларини уларнинг тоифаларидан келиб чиқиб ривожлантириш, тадбиркорлик муҳитини яхшилаш ва электромобиллардан фойдаланиш инфратузилмасини кенгайтиришга хизмат қилади. Мажлисда қонун лойиҳаси депутатлар томонидан қабул қилинган.
Июль бошларида Ўзбекистон ҳукумати қарори билан “20 минг тадбиркор — 500 минг малакали мутахассис” дастури доирасида тадбиркорлик субъектларига солиқ ва божхона имтиёзлари ҳамда преференсияларни қўллаш тартиби тўғрисида”ги низом қабул қилинганди.
Низомга кўра, Ижтимоий ҳимоя ягона реестрига киритилган фуқаролар камида 1 йил давомида иш билан таъминланган ва улар жами ишчилар сонининг камида 20 фоизини ташкил этган тадбиркорлар мол-мулк ва ер солиғи бўйича солиқ имтиёзларидан фойдаланиш ҳуқуқига эга бўлади.
Изоҳ (0)