Associated Press агентлиги хабар беришича, Ҳиндистон шимолида бир неча кундан бери давом этаётган муссон ёмғирлари оқибатида юзага келган кўчки ва тошқинлар туфайли 100 дан ортиқ одам ҳалок бўлди.
Ҳимачал-Прадеш штати маъмуриятининг маълум қилишича, у ерда камида 88 киши ҳалок бўлган, 100 дан ортиқ киши жароҳатланган.
Ёмғирлар автомашиналар, автобуслар ва кўприкларни ювиб кетган сув тошқинларига олиб келди, 170 га яқин уйни вайрон қилди ва 600 га яқин уйни шикастлади.
Яна 12 киши Уттар-Прадешда, бир киши Деҳлида ва яна тўрт киши Ҳиндистон назоратидаги Кашмирда ҳалок бўлди.
Вертолётлар шанба кунидан бери Ҳимачал-Прадеш штатининг Чандертал туманида қолиб кетган 300 га яқин одамни қутқарди, уларнинг деярли барчаси сайёҳлар.
Деҳлининг Жамна дарёси яқинида жойлашган турар жойлар сув остида қолди, ҳукумат 30 мингга яқин одамни хавфсиз жойларга кўчирди. Коллежлар ва мактаблар вақтинча ёпилди. Дарёнинг сув сатҳи кўтарилишда давом этмоқда.
Маълум қилинишича, яқин орада мамлакатда яна муссон ёмғирлари ёғиши мумкин.
Изоҳ (0)