Associated Press agentligi xabar berishicha, Hindiston shimolida bir necha kundan beri davom etayotgan musson yomg‘irlari oqibatida yuzaga kelgan ko‘chki va toshqinlar tufayli 100 dan ortiq odam halok bo‘ldi.
Himachal-Pradesh shtati ma’muriyatining ma’lum qilishicha, u yerda kamida 88 kishi halok bo‘lgan, 100 dan ortiq kishi jarohatlangan.
Yomg‘irlar avtomashinalar, avtobuslar va ko‘priklarni yuvib ketgan suv toshqinlariga olib keldi, 170 ga yaqin uyni vayron qildi va 600 ga yaqin uyni shikastladi.
Yana 12 kishi Uttar-Pradeshda, bir kishi Dehlida va yana to‘rt kishi Hindiston nazoratidagi Kashmirda halok bo‘ldi.
Vertolyotlar shanba kunidan beri Himachal-Pradesh shtatining Chandertal tumanida qolib ketgan 300 ga yaqin odamni qutqardi, ularning deyarli barchasi sayyohlar.
Dehlining Jamna daryosi yaqinida joylashgan turar joylar suv ostida qoldi, hukumat 30 mingga yaqin odamni xavfsiz joylarga ko‘chirdi. Kollejlar va maktablar vaqtincha yopildi. Daryoning suv sathi ko‘tarilishda davom etmoqda.
Ma’lum qilinishicha, yaqin orada mamlakatda yana musson yomg‘irlari yog‘ishi mumkin.
Izoh (0)