Элтон Жон беш йиллик хайрлашув турнесини якунлади. У энг сердаромад гастрол сифатида тарихда қолди

Британиялик мусиқачи Элтон Жон беш йил давомида узлуксиз давом этган хайрлашув гастролларини якунлади. 76 ёшли қўшиқчи ўзининг сўнгги концертини Стокгольмда ўтказди.

Ҳаммаси бўлиб Жон концертда 23 та қўшиқ ижро этди. Финалда у худди шу номдаги 1973 йилги альбомидаги Goodbye Yellow Brick Road шоусининг титул композициясини куйлади.

“Мен ҳаётимдаги энг улкан мартабага эришдим. Мусиқа басталашдек ҳақиқий қувончнинг 52 йиллиги”, — дейди мусиқачи Goodbye Yellow Brick Road қўшиғини ижро этишдан аввал.

Жон бундан сўнг ҳеч қачон гастрол концертларини уюштирмаслигини таъкидлади. Аммо у келгусида “бир марталик” концертлар ўтказиши мумкинлигини қайд этиб ўтган.

Yellow Brick Road Tour хайрлашув концерти бошланганидан сўнг, бу вақт ичида Элтон Жон бутун дунё бўйлаб 330 марта концерт берди. Июнь ойининг ўрталарига келиб Billboard шоу учун чипталар сотуви 900 миллион доллардан ошганини тахмин қилди. Шу тариқа бу турлар тарихдаги энг юқори даромадга айланди. Аввалги рекорд Эд Ширанга 800 миллион доллар миқдор билан тегишли эди.