Twitter собиқ ходимлари компания уларга камида 500 миллион доллар миқдоридаги ишдан бўшатиш нафақасини тўлашдан бош тортаётгани юзасидан жамоавий даъво қўзғатди, деб хабар бермоқда Reuters.
Сан-Франсиско федерал судига Кортни Макмиллиан томонидан ариза берилган, у 2023 йил январь ойида ишдан бўшатилгунга қадар ходимларга нафақа бериш дастурларига масъул бўлим бошлиғи эди.
Унинг айтишича, 2019 йилда Twitter томонидан қабул қилинган ишдан бўшатиш тўғрисидаги режада кўпчилик ходимларга икки ойлик иш ҳақи ҳамда улар ишлаган ҳар бир йил учун қўшимча бир ҳафталик иш ҳақи тўланиши айтилган.
Макмиллианнинг сўзларига кўра, компания аксарият ходимларга ишдан бўшатиш нафақасини умуман тўламаган, баъзиларга фақат бир ойлик маош тўлаб берилган.
Бу Twitter ходимларининг ишдан бўшатилиш сабаб биринчи марта судга мурожаат қилиши эмас, аммо аввалги суд жараёнлари, асосан, меҳнат шартномалари бузилиши билан боғлиқ бўлган. Жумладан, июнь ойида Twitter компанияси собиқ ходимларига шартнома бўйича бонуслар сифатида миллионлаб долларларни тўламаганликда айбланиб, компанияга қарши жамоавий даъво қўзғатилган эди. Шу билан бирга, янги суд жараёнида компания ижтимоий нафақалар тўғрисидаги федерал қонунни бузганликда айбланмоқда.
Twitter’дан изоҳ сўраган Reuters’га эможи билан жавоб келди. Агентлик буни компанияда ОАВ билан алоқалар бўлими йўқ, деб тушунтирди.
- Tesla ва SpaceX асосчиси Илон Маск 2022 йил октябрь ойи охирида Twitter эгасига айланганди. У зудлик билан Twitter’да кенг кўламли қисқартиришларни амалга оширди ва буни зарарга кираётган компанияни қайта қуриш билан изоҳлади. Reuters хабар беришича, Маск ходимларнинг ярмига яқинини ишдан бўшатган, қолганларини эса қўшимча иш қилишга мажбурлаган. Шундан кейин яна юзлаб ходимлар компанияни тарк этган.
Изоҳ (0)