Туркманистон пойтахти Ашхобод шаҳридаги Давлат маданият марказида собиқ президент, амалдаги Халқ кенгаши раиси Гурбангули Бердимуҳамедовнинг “Ömrümiň mаnysynyň dоwаmаty” (“Ҳаётим мазмунини давом эттириш”) номли янги китоби тақдимоти бўлиб ўтди. Бу ҳақда “Ватан” ахборот дастурига таяниб, Turkmenportal хабар бермоқда.
Китоб Туркманистон оммавий ахборот воситаларида мадҳ этилди. Таъкидланишича, Бердимуҳамедовнинг янги ижоди “мазмуни ва маъноси жиҳатдан ўзига хос”.
“Китобда мустақил бетараф Туркманистон эришган ютуқлар тўғрисидаги маълумотлар жамланган, туркман халқининг авлоддан авлодга ўтиб келаётган миллий маънавий-ахлоқий қадриятлари ҳақида маълумотлар, шунингдек, муаллифнинг ҳикматли фикрлари ва мулоҳазалари ўрин олган”, — дейилади хабарда.
Шунингдек, “маҳорат билан уюштирилган адабий тақдимот ўқувчини Туркманистоннинг шонли даври, тарихи ва маданияти тўғрисида чуқур мулоҳазалар оламига чорлаши” айтилган.
Китоб тақдимотида ҳукумат аъзолари, парламент депутатлари, қатор вазирлик ва идоралар, жамоат ташкилотлари раҳбарлари ва вакиллари, маданият ва санъат намояндалари, фахрий оқсоқоллар, талаба ёшлар, журналистлар иштирок этди.
Афтидан, янги китоб Бердимуҳамедовнинг ўтган баҳорда тақдим этилган “Ҳаётим мазмуни” китобининг давоми саналади.
Гурбангули Бердимуҳамедов турли мавзуларда ёзилган камида 50 та китоб муаллифи. У тиббиёт, фалсафа, маданият, маънавият мавзуларига оид асарлар, Алабай итлари, Ахалтеки отлари, спорт ва аждодларга бағишланган қатор романлар ёзган. Бундан ташқари, Бердимуҳамедов шеър ёзади, қўшиқ айтади, митингларда қатнашади, велосипедда баскетбол ўйнаш ва мерганлик мусобақаларида қатнашади.
Изоҳ (0)