Туркманистон пойтахти Ашхободдан 30 километр узоқликда жойлашган янги Арқадағ шаҳрида Аба Аннаев номидаги Халқаро йилқичилик академияси ва Гўруғли номидаги от цирки очилди, деб ёзмоқда “Нейтральний Туркменистан” газетаси.
“Туркманистон қадимий соф наслли Ахалтеке зотли отларнинг ватани ҳисобланади. Академияга афсонавий отларнинг наслчилик линияларини яратишга ҳисса қўшган машҳур мураббийнинг номи берилган”, — дейилади хабарда.
Янги институт от спорти ва туризм, цирк санъати, чавандозлик ва миллий от спорти ўйинларини ривожлантириш базасига айланади. Академия яқинида йилқичилик илмий-ишлаб чиқариш маркази, Гўруғли давлат от спорти цирки қурилди.
Ушбу мажмуалар форум, кўргазмалар ва бошқа тадбирлар ўтказиладиган жой бўлиб, халқаро ҳамкорлик платформасини ҳосил қилади.
Арқадағнинг диққатга сазовор жойларидан бири Ахалтеке айғирининг сиймосини абадийлаштирувчи “Оқ хон” ёдгорлиги бўлиб, у Гиннеснинг рекордлар китобига киритилган.
Яқинда ушбу от орқа оёқларида 10 метр масофани 4,19 сонияда босиб ўтди ва 2016 йилда ўрнатилган аввалги рекордни янгилади.
Эзиз Бояров, Ашхобод
Изоҳ (0)