Turkmaniston poytaxti Ashxobod shahridagi Davlat madaniyat markazida sobiq prezident, amaldagi Xalq kengashi raisi Gurbanguli Berdimuhamedovning “Ömrümiň manysynyň dowamaty” (“Hayotim mazmunini davom ettirish”) nomli yangi kitobi taqdimoti bo‘lib o‘tdi. Bu haqda “Vatan” axborot dasturiga tayanib, Turkmenportal xabar bermoqda.
Kitob Turkmaniston ommaviy axborot vositalarida madh etildi. Ta’kidlanishicha, Berdimuhamedovning yangi ijodi “mazmuni va ma’nosi jihatdan o‘ziga xos”.
“Kitobda mustaqil betaraf Turkmaniston erishgan yutuqlar to‘g‘risidagi maʼlumotlar jamlangan, turkman xalqining avloddan avlodga o‘tib kelayotgan milliy maʼnaviy-axloqiy qadriyatlari haqida maʼlumotlar, shuningdek, muallifning hikmatli fikrlari va mulohazalari o‘rin olgan”, — deyiladi xabarda.
Shuningdek, “mahorat bilan uyushtirilgan adabiy taqdimot o‘quvchini Turkmanistonning shonli davri, tarixi va madaniyati to‘g‘risida chuqur mulohazalar olamiga chorlashi” aytilgan.
Kitob taqdimotida hukumat a’zolari, parlament deputatlari, qator vazirlik va idoralar, jamoat tashkilotlari rahbarlari va vakillari, madaniyat va san’at namoyandalari, faxriy oqsoqollar, talaba yoshlar, jurnalistlar ishtirok etdi.
Aftidan, yangi kitob Berdimuhamedovning o‘tgan bahorda taqdim etilgan “Hayotim mazmuni” kitobining davomi sanaladi.
Gurbanguli Berdimuhamedov turli mavzularda yozilgan kamida 50 ta kitob muallifi. U tibbiyot, falsafa, madaniyat, ma’naviyat mavzulariga oid asarlar, Alabay itlari, Axalteki otlari, sport va ajdodlarga bag‘ishlangan qator romanlar yozgan. Bundan tashqari, Berdimuhamedov she’r yozadi, qo‘shiq aytadi, mitinglarda qatnashadi, velosipedda basketbol o‘ynash va merganlik musobaqalarida qatnashadi.
Izoh (0)